Muqdisho (Dawan) – Dowladda Federaalka Soomaaliya ayaa bilowday baadi-goob lagu xaqiijinayo aqoonsiga muwaadiniin la tuhunsan yahay inay ku geeriyoodeen xeebaha dalka Aljeeriya, kaddib markii sawirro meydad ah loo gudbiyay hay’adaha dowladda.
Sida ay sheegeen mas’uuliyiinta, sawirro gaaraya ilaa 17 meyd oo leh astaamo muujinaya inay Soomaali yihiin ayaa habeenkii Sabtida lagu soo bandhigay Muqdisho, si ehelada dadka la la’yahay ay u aqoonsadaan.
Wararka ayaa tilmaamaya in meydadka ay isugu jiraan rag iyo dumar, da’dooduna lagu qiyaasay inta u dhaxeysa 18 ilaa 30 sano, kuwaas oo la rumeysan yahay inay ku safreen doon ay saarnaayeen tahriibayaal oo ku qallibantay xeebaha Aljeeriya.
