Muqdisho (Dawan)— Dowladda Federaalka Soomaaliya ayaa ku dhawaaqday tallaabooyin lagu dhiirrigelinayo ganacsiga kalluunka, iyadoo canshuur-dhaaf loo sameeyay qaar ka mid ah ganacsatada Soomaaliyeed ee kalluunka u dhoofisa ama awood u leh inay u dhoofiyaan suuqa Shiinaha.
Arrintan ayaa lagu shaaciyay Madasha Daneeyayaasha Kalluumeysiga Soomaaliya oo lagu qabtay magaalada Muqdisho, taasoo diiradda lagu saaray horumarinta waaxda kalluumeysiga, caqabadaha hortaagan iyo fursadaha dhaqaale ee ku jira kheyraadka badda Soomaaliya.
Madasha waxaa soo qabanqaabiyay Magan Forum iyo Hay’adda Cilmi-baarista Badaha Soomaaliyeed, waxaana ka qeyb galay daneeyayaal ka kala socday waaxda kalluumeysiga, ganacsatada, cilmi-baarayaasha iyo hay’adaha dowladda, iyadoo ay goobta ku sugnaayeen xubno ka tirsan Xukuumadda Federaalka Soomaaliya.
Wasiirka Wasaaradda Kalluumeysiga iyo Dhaqaalaha Buluugga ah, Axmed Xasan Aadan, oo furay madasha, ayaa sheegay in dowladda ay mudnaan siinayso horumarinta kalluumeysiga iyo ka faa’iideysiga kheyraadka badda, si uu qeyb uga noqdo koboca dhaqaalaha dalka.
Wasiirka ayaa sheegay in dowladda ay qaadday tallaabo lagu fududeynayo ganacsiga kalluunka, gaar ahaan kuwa u dhoofinaya suuqyada caalamka.
“Waxaan saxiixnay heshiis canshuurta looga dhaafayo Soomaalida ka ganacsata kalluunka ee awoodda u yeeshay inay geeyaan dalka Shiinaha. Wax canshuur ah oo laga qaadayo ma jirto,” ayuu yiri Wasiirka Kalluumeysiga iyo Dhaqaalaha Buluugga ah, Axmed Xasan Aadan.
Kheyraad badeed leh awood dhaqaale oo weyn
