UK, 10 Maarso 2026 (Dawan)– Guddoomiyaha Hay’adda Maareynta Masiibooyinka Qaranka Soomaaliyeed (SoDMA), Maxamuud Macallin Cabdulle, ayaa ka codsaday deeq-bixiyeyaasha caalamiga ah in taageerada dhaqaale si toos ah loogu shubo Sanduuqa Qaranka ee Masiibooyinka, si kor loogu qaado difaaca bulshada nugul ee ay saameeyeen masiibooyinka ka dhasha isbeddelka cimilada.
Isagoo ka hadlayay shir-madaxeed ka dhacay Boqortooyada Ingiriiska (UK), ayna wehelinayeen Agaasimaha Guud ee Wasaaradda Maaliyadda, Saleebaan Cumar, iyo mas’uuliyiin ka tirsan Xafiiska Ra’iisul Wasaaraha iyo Wasaaradda Shaqada iyo Arrimaha Bulshada, ayuu Cabdulle sheegay in dalku hadda ka guurayo gargaarkii ku dhisnaa ka-jawaabista dhibaatada ka dib, una gudbayo nidaam joogto ah oo ay dowladdu hoggaaminayso, kaas oo u diyaarsan ka-jawaabista degdegga ah ee masiibooyinka.
“Waxaan si fiican u ognahay qiimaha ay ku kacdo ficilka dib u dhaca,” ayuu yiri Cabdulle, isagoo xusay in dalku wajahayo meerto joogto ah oo isugu jirta abaar, colaad iyo isbeddelka cimilada. “Taasi waa sababta aan uga gudubnay doodaha iyo baaqyada, una diiradda saarnay dhisidda nidaamyo shaqeynaya oo la taaban karo.”
Guddoomiyuhu wuxuu sheegay in dib-u-habayntii hay’adeed ee 2025 ka dib, SoDMA ay hadda noqotay hay’adda hormuudka ka ah fulinta nidaamka qaranka ee Badbaadada Bulshada ee ka-jawaabista masiibooyinka (SRSP).
