Soomaaliya, 30 Nofeembar 2025 – Wasaaradda Kalluumeysiga iyo Dhaqaalaha Buluugga ah ee Soomaaliya ayaa Jimcaha shalay si rasmi ah u daah-furtay Mashruuca Xog-Ururinta Kalluumeysiga iyo Nidaamka Maareynta Xogta Kalluumeysiga (FIMS) oo uu maalgeliyey Mashruuca BADMAAL.
Nidaamkan cusub ayaa waxaa loogu talagalay in lagu mideeyo xogta kalluumeysiga ee heer Federaal iyo Dowlad-Goboleed, isla markaana lagu xoojiyo kormeerka hawlaha kalluumeysiga, iyadoo loo suurtagelinayo go'aan qaadashada ku saleysan caddaynta iyo cilmi-baaris dhab ah. Nidaamkani wuxuu caawin doonaa hay'adaha dowladda ee Soomaaliya inay si sax ah u daba-galaan kheyraadka badda, iyagoo xoojinaya maamulka iyo hagida maareynta waara ee xeebta Soomaaliya oo gaaraysa 3,333-kiloo mitir laba jibaaran.
Wasiirka Kalluumeysiga iyo Dhaqaalaha Buluugga ah, Axmed Xasan Aadan, ayaa sheegay in mashruucan uu muhiim u yahay ilaalinta kheyraadka badda iyo dib-u-soo-nooleynta maamulka Soomaaliya ee kheyraadkeeda. “Dowladda Federaalka Soomaaliya waxay mudnaanta siisay in mashruucan dib loo nooleeyo, maadaama uu ka mid yahay ilaalinta hantida Soomaalida, waxaana uu dhaxal u noqon doonaa sidii Soomaaliya u maamuli lahayd kheyraadkeeda,” ayuu yiri.
