Soomaaliya oo daahfurtay Siyaasadda Qaran ee Ilaalinta Rayidka xilliyada hawlgallada ciidan

Muqdisho (Dawan) – Dowladda Federaalka Soomaaliya ayaa maanta daahfurtay Siyaasadda Qaran ee Ilaalinta Bedqabka Rayidka Xilliyada Hawlgallada Ciidan iyo Colaadaha Hubaysan, taas oo lagu hagayo ciidamada iyo hay’adaha amniga si loo yareeyo waxyeellada soo gaarta shacabka.

Wasiirka Gaashaandhigga Soomaaliya, Axmed Macallin Fiqi, ayaa maanta daahfuray siyaasaddan, xilli ay sii kordhayaan baaqyada ku saabsan in shacabka, hantidooda iyo ilaha ay ku tiirsan yihiin si wanaagsan loo ilaaliyo marka ay socdaan hawlgallada amniga.

Munaasabadda waxaa ka qaybgalay mas’uuliyiin ka kala socday Dowladda Federaalka iyo dowlad-goboleedyada, diblomaasiyiin iyo wakiillo ka socday hay’adaha ay khuseyso hirgelinta siyaasadda.

Wasiir Fiqi ayaa sheegay in ilaalinta bedqabka rayidku ay tahay waajib qaran iyo mid dastuuri ah oo saaran dowladda. Waxa uu tilmaamay in dhowrista shacabka ay lama huraan u tahay dhismaha ciidan qaran oo anshax iyo isla-xisaabtan leh.

Daahfurka siyaasaddan ayaa imanaya maalmo kaddib markii beeraleyda gobolka Shabeellaha Hoose ay dowladda u gudbiyeen cabashooyin la xiriira dhibaatooyin ay sheegeen inay kala kulmeen Al-Shabaab iyo waxyeellooyin ka dhashay qaar ka mid ah hawlgalladii amni ee gobolka ka dhacay.

Wasiirka Beeraha iyo Waraabka, Maxamed Cabdi Xayir Maareeye, Wasiiru-dowlaha Gaashaandhigga, Cumar Cali Cabdi, iyo Taliyaha Ciidanka Dhulka, Sareeye Guuto Sahal Cabdullaahi Cumar, ayaa 29-kii Agoosto kulan la yeeshay qaar ka mid ah beeraleyda Shabeellaha Hoose.

Beeraleyda ayaa mas’uuliyiinta la wadaagay cabashooyin ku saabsan waxyeellooyin ay sheegeen inay ka soo gaareen hawlgalladii ugu dambeeyay, iyagoo sidoo kale ka hadlay dhibaatooyinka ay Al-Shabaab ku hayso deegaannadooda. Mas’uuliyiintu waxay ballanqaadeen in cabashooyinka la diiwaangelin doono, loona gudbin doono hay’adaha ay khuseyso si loo baaro. Wasaaradda Gaashaandhigga

Siyaasadda cusub ayaa la filayaa inay dejiso habraacyo lagu ilaalinayo rayidka, laguna yareynayo khasaaraha soo gaara dadka iyo hantidooda. Dowladda ayaan weli faahfaahin ka bixin hannaanka lagu hirgelinayo siyaasadda, cidda kormeeri doonta fulinteeda iyo tallaabooyinka laga qaadayo marka la diiwaangeliyo waxyeello loo geystay rayidka.

Soomaaliya oo daahfurtay Siyaasadda Qaran ee Ilaalinta Rayidka xilliyada hawlgallada ciidan

Soomaaliya oo dhammaystirtay hannaanka ku biirista Heshiiska Aagga Ganacsiga Xorta ah ee Afrika

Dowladda iyo mucaaradka Soomaaliya oo la filayo in ay heshiis ka gaaraan arimaha khilaafaadka

Maraakiibta dagaalka Turkiga ee qeybta ka ah howlgalka Soomaaliya oo ku soo xiranaya Muqdisho

Turkiga oo qiray inuu Soomaaliya ka taageeray soo furashada markabka MV LUTUF

Maqaallo La Xidhiidha

Turkiga oo taageeraya mashruuc sifeynta kelyaha ah oo ay ka faa’iideysanayaan 300 oo Soomaali ah

Dhakhaatiir Sacuudiyaan ah oo qaliimo lacag la'aan ah ka fulinaya Jigjiga

Imisa ayuu gaaray dakhliga dhoofinta xoolaha Itoobiya?

Qaybaha

Qoraallo Cusub

Soomaaliya oo dhammaystirtay hannaanka ku biirista Heshiiska Aagga Ganacsiga Xorta ah ee Afrika

Soomaaliya oo daahfurtay Siyaasadda Qaran ee Ilaalinta Rayidka xilliyada hawlgallada ciidan

Dowladda iyo mucaaradka Soomaaliya oo la filayo in ay heshiis ka gaaraan arimaha khilaafaadka