Muqdisho (Dawan)- Wasaaradda Hawlaha Guud, Dib-u-dhiska iyo Guriyeynta Dowladda Federaalka Soomaaliya ayaa magaalada Muqdisho ka daahfurtay tartanka qandaraaska mashruuca dhismaha waddada Beledweyne–Kalabayr, oo dhererkeedu yahay 22 kiiloomitir.
Munaasabadda furitaanka tartanka waxaa si rasmi ah u daahfuray Wasiiru-dowlaha Wasaaradda Hawlaha Guud, Saciid Maxamed Maxamuud (Xayd), waxaana ka qeyb galay mas’uuliyiin ka tirsan Wasaaradda, kooxda RIPSO iyo wakiillo ka socday shirkadaha u tartamaya qandaraaska mashruuca.
Wasaaradda ayaa sheegtay in furitaanka dalabyadu uu yahay tallaabo muhiim ah oo ka mid ah hannaanka qandaraas-siinta mashruuca, kaas oo loo fulinayo si waafaqsan habraacyada iyo shuruucda wax-iibsiga ee Bangiga Horumarinta Afrika (AfDB), iyadoo la xaqiijinayo hufnaan, daahfurnaan iyo tartan caddaalad ah.
Tartanka ayaa lagu doonayaa in lagu soo xulo shirkad leh awood farsamo, waayo-aragnimo iyo karti ku filan oo ay mashruuca ugu fulin karto tayada iyo shuruudaha loo asteeyey.
