Addis Ababa (Dawan)– Soomaaliya ayaa dhammaystirtay hannaanka rasmiga ah ee ku biirista Heshiiska Aagga Ganacsiga Xorta ah ee Qaaradda Afrika (AfCFTA), kaddib markii ay Midowga Afrika ku wareejisay dukumentiga ansixinta heshiiska.
Wasiirka Ganacsiga iyo Warshadaha Soomaaliya, Jamaal Maxamed Xasan, ayaa dukumentiga ku wareejiyay Midowga Afrika, intii lagu jiray munaasabad ka dhacday xarunta ururka ee magaalada Addis Ababa. Tallaabadan ayaa Soomaaliya ka dhigtay dalkii 50-aad ee si rasmi ah u ansixiya heshiiska.
Gudbinta dukumentiga ayaa soo gebagebeysay hannaankii sharciyeed ee Soomaaliya, kaddib markii heshiiska uu ansixiyay Baarlamaanka Federaalka, isla markaana uu saxiixay Madaxweyne Xasan Sheekh Maxamuud.
“Maanta, Soomaaliya waxay noqotay dalkii 50-aad ee xubin rasmi ah ka noqda AfCFTA,” ayuu yiri Wasiir Jamaal.