Muqdisho, 19 Oktoobar 2025 — Guddiga Madaxabannaan ee Doorashooyinka Qaranka Soomaaliyeed (NIEBC) ayaa si rasmi ah u shaaciyay liiska hordhaca ah ee cod-bixiyeyaasha Gobolka Banaadir, iyagoo xaqiijiyay in 923,220 qof laga diiwaangeliyay 16-ka degmo ee magaalada Muqdisho.
Tiradaas ayaa lagu soo bandhigay munaasabad ka dhacday magaalada Muqdisho, iyadoo Guddigu uu sheegay in 99.53% diiwaangelintu ay ahayd mid sax ah, halka 0.47%—qiyaastii 4,330 oo qof— is diiwaangelintooda lagu helay iney laba jeer is diiwaangeliyeen,Diiwaangelintaan ayaana socotay muddo shan bilood ah, iyadoo laga sameeyay 56 xarumood oo ku kala yaalla caasimadda.
Guddoomiyaha Gudiga Doorashooyinka, Cabdikariim Axmed Xasan, ayaa ku tilmaamay guushan mid taariikhi ah, maadaama ay tahay diiwaangelintii ugu ballaarneyd ee laga sameeyo Muqdisho muddo in ka badan 50 sano ah.
“Wadar ahaan 923,220 muwaadin ayaa isdiiwaangeliyay. Waa marxalad taariikhi ah oo uu dalku marayo,” ayuu yiri. “Amaan gaar ah waxaa leh Dowladda Federaalka oo bixisay dhaqaalihii, xaqiijisay amniga, isla markaana si dhow ula shaqeysay Maamulka Gobolka Banaadir.”
Guddoomiyaha Gobolka Banaadir ahna Duqa Muqdisho, Xasan Maxamed Xuseen (Muungaab), ayaa isna bogaadiyay natiijada, isagoo sheegay in ay muujineyso kalsoonida shacabka iyo dareenka mas’uuliyadeed ee muwaadiniinta.
“In Muqdisho laga diiwaangeliyo ku dhawaad hal milyan qof ma ahan wax lala yaabo; waa caasimaddii,” ayuu yiri. “Inkasta oo ay jireen caqabado, haddana ka-qaybgalka wuu fiicnaa, waxaana suuragal ah in tiradani ay sii kordhi lahayd haddii duruufaha ay wanaagsanaan lahaayeen.”
Wasiirka Arrimaha Gudaha, Federaalka iyo Dib-u-heshiisiinta, Cali Yuusuf Cali Xoosh, ayaa bogaadiyay shaqada NIEBC iyo Maamulka Banaadir, wuxuuna mar kale adkeeyay in dowladda dhexe aysan faragelin doonin hanaanka doorashada.
“Qofna ma diidi karo in ku dhawaad hal milyan qof ay isdiiwaangeliyeen Muqdisho,” ayuu yiri. “Jihada ay qaadeen waa jihada uu dalka qaadanayo. Qofkii ku biira wuu kusoo biirayaa; kii hor-istaagana khatar ayuu wajahayaa. Tareenkan wuu dhaqaaqay. Qof walba door ayuu leeyahay, dowladda dhexdeedana faragelin ma jiri doonto.”
Si kastaba ha ahaatee, shaacinta liiska hordhaca ah ayaa ku soo beegmaysa iyadoo ay jiraan khilaafaad siyaasadeed, waxaana jira xisbiyo mucaarad ah oo horey u dhaliilay hannaanka diiwaangelinta, iyagoo ku eedeeyay Guddiga Doorashooyinka inaanay si hufan u maamulin geeddi-socodka.