Soomaaliya oo hiigsanaysa inay Rwanda ka gudubto si ay u gaarto Finalka CECAFA U-17

Dhanka kale, Wasiirka Dhallinyarada iyo Ciyaaraha Xukuumadda Federaalka Soomaaliya, Maxamed Cabduqaadir Cali, iyo Guddoomiyaha Xiriirka Kubadda Cagta Soomaaliya, ahna Madaxweyne Ku-xigeenka CECAFA, Cali Cabdi Maxamed (Cali Shiine), ayaa gaaray dalka Rwanda si ay taageero iyo dhiirrigelin ugu muujiyaan ciyaartoyda Soomaaliyeed. Labada mas’uul ayaa bogaadiyay dadaalka iyo bandhigga ciyaareed ee ay muujiyeen ciyaartoyda da’yarta ah intii uu tartanku socday, iyagoo ku dhiirrigeliyay inay sii wadaan dadaalkooda si ay u gaaraan finalka, una matalaan dalkooda si wanaagsan.

Kulanka Soomaaliya iyo Rwanda ayaa muhiim u ah labada xul, maadaama natiijadiisu ay go’aamin doonto kooxda u gudbaysa finalka iyo kooxda ka hari doonta tartanka. Haddii Soomaaliya ay ka adkaato Rwanda, waxay u gudbi doontaa finalka CECAFA U-17, iyadoo sidoo kale xaqiijin karta u soo bixitaanka Koobka Qaramada Afrika ee xulalka da’yarta, kaas oo la qaban doono sannadka 2027.

Ciyaartan ayaa imanaysa xilli xulka da’yarta Soomaaliya uu doonayo inuu sii ambaqaado natiijooyinkii wanaagsan ee uu ka soo hooyay wareegga guruubyada, isla markaana uu qaado tallaabo kale oo uu ugu dhawaanayo ka qaybgalka tartanka qaaradeedka ee U-17.