Addis Ababa (Dawan) — Soomaaliya ayaa maanta oo Khmiis ah ugu baaqday dalalka Geeska Afrika inay u shaqeeyaan dhismaha aag dhaqaale oo mideysan, xilli wasiirrada ganacsiga ee gobolka ay yeesheen shirkii ugu horreeyay ee heer wasiir ah ee Hindisaha Geeska Afrika.
Wasiirka Ganacsiga iyo Warshadaha Soomaaliya, Jamaal Maxamed Xasan, oo guddoomiyay furitaanka shirka, ayaa ku baaqay in la xoojiyo is-dhexgalka dhaqaale ee gobolka, isla markaana dalalka xubnaha ka ah hindisaha ay ka gudbaan ballanqaadyada siyaasadeed una gudbaan tallaabooyin wax-ku-ool ah oo faa’iido u leh ganacsatada iyo shacabka.
“Himiladeennu waa Geeska Afrika oo xuduudihiisu isku xiran yihiin dhaqaale ahaan, halkii ay kala qaybsanaan lahaayeen,” ayuu wasiirku yiri, sida lagu sheegay bayaan ay soo saartay Wasaaradda Ganacsiga iyo Warshadaha Soomaaliya.
Jamaal ayaa carrabka ku adkeeyay muhiimadda ay leedahay ansixinta iyo hirgelinta Qorshe-hawleedka Fududeynta Ganacsiga Gobolka ee 2026–2031, dhismaha Guddiga Goboleed ee Fududeynta Ganacsiga (RTFC) iyo in dalalka xubnaha ka ah hindisaha ay waqtigii loogu talagalay soo magacaabaan wakiilladooda guddiga.
Wuxuu sidoo kale ku baaqay isku-dubarid xooggan oo dhex mara dalalka, maalgelin ku filan iyo ka-qaybgal dhab ah oo ay ganacsatada iyo hay’adaha gaarka loo leeyahay ku yeeshaan qorshaha, si loo gaaro natiijooyin la cabbiri karo.
Wasiirrada ganacsiga ee Itoobiya, Jabuuti, Kenya, Koonfurta Suudaan iyo Suudaan, oo ay weheliso Soomaaliya, ayaa muujiyay taageeradooda qorshe-hawleedka iyo guddiga goboleed ee la soo jeediyay, sida ay sheegtay wasaaraddu.
