Boqortooyada Ingiriiska, 28 Nofeembar 2025 – Soomaaliya ayaa si rasmi ah ugu biirtay Ururka Caalamiga ah ee Isgaarsiinta Satalaytiga ee Badda (IMSO), oo ah hay’ad caalami ah oo iskugu xira dowladaha dunida, kuna shaqada leh kormeerka adeegyada isgaarsiinta satalaytiga ee loo adeegsado badbaadada iyo amniga badda.
Ku biirista Soomaaliya ayaa timid kadib markii Golaha Wasiirradu ay 20-kii Nofeembar ansixiyeen Heshiiska IMSO. Xoghayaha Guud ee IMO, Arsenio Dominguez, oo ah deebaajiga rasmiga ah ee Heshiiska IMSO, ayaa dukumeentiga ku wareejiyey Wasiirka Dekedaha iyo Gaadiidka Badda ee Soomaaliya, Cabdikadir Maxamed Nuur.
Agaasimaha Guud ee IMSO, Laurent Parenté, ayaa sheegay Jimcihii:“Jamhuuriyadda Federaalka Soomaaliya waxay ku biirtay Heshiiska IMSO 27 Nofeembar 2025, waxaana tirada dalalka xubnaha ka ah ururka ay gaartay 111.”
Xafladda ku biirista oo Khamiistii lagu qabtay London waxaa ka qayb galay Agaasimaha Guud ee Dekedda Muqdisho, Amb. Maxamed Cali Nuur, iyo Safiirka Soomaaliya ee UK, Amb. Cabdikadir Cabdi Xaashi.
Go’aanka Soomaaliya uu aad ayuu muhiim u yahay, maadaama dalku leeyahay xeebta ugu dheer Afrika oo dhererkeedu gaarayo qiyaastii 3,333 km, iyo Aag Dhaqaale oo Khaas ah (EEZ) oo lagu qiyaaso 825,000 illaa 831,000 km², sida ay muujinayaan Xogaha Bangiga Adduunka.
Soomaaliya waxa ay ku taallaa meel istaraatiiji ah oo u dhow marin-biyoodka muhiimka ah ee Gacanka Cadmeed iyo Badweynta Hindiya, halkaas oo kumannaan markab ay sanad walba maraan. Tani waxay muujinaysaa baahida loo qabo kormeer iyo badbaado badeed oo hufan.
