Uganda, 15 November 2025 — Soomaaliya ayaa martigelin doonta Shirka Guddoomiyeyaasha Baarlamaanada Bulshada Bariga Afrika (EAC) bisha May 2026, sida uu Baarlamaanka Soomaaliya sheegay Jimcihii.
Go’aankan waxaa lagu ansixiyay kulankii 20-aad ee Golaha Guddoomiyeyaasha Baarlamaanada EAC oo ka dhacay magaalada Kampala, halkaas oo Guddoomiyaha Golaha Shacabka Soomaaliya, Aadan Maxamed Nuur “Madoobe”, loogu doortay Guddoomiyaha Golaha Guddoomiyeyaasha ee 2025–2026.
Madoobe wuxuu xilka kala wareegayaa Moses Wetangula, Guddoomiyaha Baarlamaanka Kenya, oo hoggaaminayey golaha tan iyo 13-kii November 2024.
Isagoo ka hadlayay kulanka, Madoobe wuxuu sheegay in doorashada Muqdisho ay ku soo aadday xilli dowladaha xubnaha ka ah EAC ay dardar gelinayaan dadaallada lagu xoojinayo is-dhexgalka gobolka, lagu sii ballaarinayo iskaashiga baarlamaanada, laguna taageerayo xasilloonida siyaasadeed ee Bariga Afrika.
Wuxuu sidoo kale xaqiijiyay in Soomaaliya ay ka go’an tahay ka-qaybgal firfircoon iyo door muuqda oo ku wajahan howlaha ururka, oo ay si rasmi ah ugu biirtay dhamaadka sanadkii 2023.
Golaha Guddoomiyeyaasha Baarlamaanada EAC wuxuu isu keenaa madaxda baarlamaanada dalalka xubnaha ka ah ururka, isaga oo door muhiim ah ka qaata isku-duwidda ajandayaasha sharci-dejinta, mideynta habraacyada baarlamaanada, iyo kor u qaadista iskaashiga goboleed.
