Soomaaliya oo meelmarisay heshiis ay la gashay Turkiga oo ku saabsan is-weydaarsiga eedeysanayaasha

Muqdisho (Dawan)– Golaha Shacabka ee Baarlamaanka Federaalka Soomaaliya ayaa Arbacadii meel mariyay heshiis iskaashi garsoor oo ay Soomaaliya la gashay Turkiga, kaas oo dhigaya is-weydaarsiga eedeysanayaasha, is-gargaarsiga sharciyeed ee arrimaha fal-dembiyeedyada iyo wareejinta maxaabiista xukuman.

Heshiiska waxaa oggolaaday 129 xildhibaan, halka 10 ay diideen, waxaana ka aamusay xal xildhibaan

Wasaaradda Cadaaladda iyo Arrimaha Dastuurka Xasan Macallin Maxamuud ayaa sheegtay in heshiisku abuurayo hannaan iskaashi rasmi ah oo labada dal u fududeynaya is-gargaarsiga sharciyeed, la-dagaallanka dembiyada iyo xoojinta wada-shaqeynta hay’adaha garsoorka.

Wasiirka Cadaaladda ayaa xildhibaannada uga mahadceliyay ansixinta heshiiska iyo doodihii iyo talooyinkii ay ka dhiibteen. Waxa uu sidoo kale bogaadiyay Guddiga Arrimaha Dibadda iyo Iskaashiga Caalamiga ah ee Golaha Shacabka oo heshiiska daraaseeyay.

Codbixinta ayaa ka dhacday akhrinta saddexaad ee heshiiska, intii lagu jiray kulanka 27-aad ee kalfadhiga siddeedaad ee Golaha Shacabka, kaas oo uu shir guddoominayay Guddoomiyaha Golaha Shacabka Cabdulqaadir Maxamed Nuur (Jaamac), oo uu wehelinayay Guddoomiye ku-xigeenka labaad Cabdullaahi Cumar Abshirow.

Kulanka, xildhibaannadu waxay sidoo kale meel mariyeen Hindise-Sharciyeedka Macmiilka Danabeysan, kaas oo helay 137 cod oo oggol ah, laba cod oo diidmo ah, halka hal xildhibaan uu ka aamusay.

Golaha Shacabka ayaa sidoo kale akhrinta koowaad marsiiyay Axdiga Dhallinyarada Afrika, oo ay soo gudbisay Wasaaradda Dhallinyarada iyo Ciyaaraha. Wasiirka wasaaradda ayaa xildhibaannada u sharraxay qodobbada axdiga.

Dhanka kale, Guddoomiyaha Golaha Shacabka ayaa sheegay in dib loo dhigay codbixinta iyo akhrinta saddexaad ee hindise-sharciyeedka wax-ka-beddelka Sharciga Bankiga Dhexe ee Soomaaliya, Sharci Lr. 130 ee Abriil 2012, kaddib markii mas’uuliyiinta wasaaradda soo diyaarisay hindisaha aysan kulanka ka soo xaadirin. Guddoomiyuhu waxa uu sheegay in Wasaaradda Maaliyadda lagula xisaabtami doono maqnaanshaha mas’uuliyiintaas.

Soomaaliya oo meelmarisay heshiis ay la gashay Turkiga oo ku saabsan is-weydaarsiga eedeysanayaasha

Soomaaliya oo dhowr dal ka codsatay taageero ay ugu diyaar garowdo fatahaadaha

Soomaaliya: Garsoore ama Ma’duun ka diiwaangashan Wasaaradda Caddaaladda oo keliya ayaa mehrin kara

Guddiga Doorashooyinka oo shaaciyey musharraxiinta hoggaanka Golaha Wakiillada Hirshabeelle

Soomaaliya iyo Uganda oo ku heshiiyay in kharashaadka Fiisaha laga dhaafo shaqaalaha Dowladda

Maqaallo La Xidhiidha

Maxay Yihiin Yoolalka uu Bangiga Dhexe ee Soomaaliya Hiigsanayo Sannadka 2029?

100 orodyahan oo ajaanib ah oo markii ugu horreysay ka qaybgalaya tartanka 10-ka KM ee Air Djibouti

Muqdisho oo markii ugu horreysay martigelisay shirka iskaashiga ganacsi ee Soomaaliya iyo Uganda