Soomaaliya oo qorshaynaysa inay nidaamka lacag-bixinta degdegga ah ku xirto shabakadaha lacag-bixinta ee gobolka

Muqdisho (Dawan) – Luulyo 26, 2026 – Bangiga Dhexe ee Soomaaliya ayaa qorshaynaya inuu ballaariyo Nidaamka Lacag-bixinta Degdegga ah (SIPS) isaga oo ku xiri doona bangiyada ganacsiga, shirkadaha lacagaha taleefannada iyo shabakadaha lacag-bixinta ee gobolka, sida uu ku sheegay maqaal uu qoray Guddoomiyaha Bangiga Dhexe, Cabdiraxmaan Maxamed Cabdullaahi, oo lagu daabacay wargeyska Business Daily Africa.

Guddoomiyuhu wuxuu sheegay in nidaamka lacag-bixinta Soomaaliya uu muddo dheer ahaa mid kala qaybsan, iyadoo bangiyada iyo shirkadaha lacagaha taleefannadu ay ku shaqaynayeen nidaamyo kala duwan, taas oo xaddidaysay isku-xirnaanta adeegyada isla markaana ka qayb qaadatay in dad badan ay ka maqnaadaan adeegyada maaliyadeed.

Waxa uu xusay in Nidaamka Qaranka ee Lacag-bixinta, oo la hirgeliyay sanadkii 2021, uu casriyeeyay wareejinta lacagaha waaweyn ee bangiyada dhexdooda, balse uusan bixin kaabayaashii loo baahnaa ee lagu fulin lahaa lacag-bixinaha maalinlaha ah ee tafaariiqda.

Cabdiraxmaan ayaa sheegay in SIPS, oo la bilaabay Jannaayo 2025 isla markaana ku dhisan halbeegga fariimaha maaliyadeed ee ISO 20022, uu suurtagelinayo lacag-bixinno degdeg ah oo dhex mara hay'adaha ku xiran nidaamka. Marka uu si buuxda u shaqeeyo, wuxuu isku xiri doonaa dhammaan 14-ka bangi ganacsi iyo siddeed shirkadood oo bixiya adeegyada lacagaha taleefannada iyo boorsooyinka elektaroonigga ah, isagoo taageeraya lacag-bixinaha u dhexeeya shakhsiyaadka, ganacsatada, hay'adaha dowladda iyo shirkadaha.

Waxa uu sheegay in nidaamkan uu maamulo Somalia Payment Switch, oo ah iskaashi u dhexeeya Bangiga Dhexe iyo 13 bangi ganacsi, isagoo tilmaamay in qaabkan wadajirka ahi uu ka adkaysi badan yahay nidaam ay maamusho oo keliya hay'adda bangiga dhexe. Sidoo kale, isku xirka nidaamka iyo heerka qaran ee lacag-bixinta QR-ka ee SOMQR ayaa la filayaa inuu fududeeyo lacag-bixinta dijitaalka ah ee ganacsatada, gaar ahaan kuwa yaryar iyo kuwa aan rasmi ahayn.

Guddoomiyuhu wuxuu sheegay in mudnaanta xigta ay tahay in nidaamka lagu daro dhammaan shirkadaha lacagaha taleefannada, si malaayiin isticmaale oo boorsooyin elektaroonig ah leh ay uga mid noqdaan hal nidaam oo isku xiran, taas oo si weyn u ballaarin doonta adeegyada maaliyadeed ee dalka.

Waxa uu intaa ku daray in Soomaaliya ay qorshaynayso inay SIPS ku xirto Nidaamka Afrika ee Lacag-bixinta iyo Isku-xisaabinta (PAPSS) ka hor dhammaadka 2026, taas oo qayb ka ah dadaallada lagu xoojinayo isdhexgalka maaliyadeed ee gobolka kadib markii Soomaaliya ay ku biirtay Bulshada Bariga Afrika (EAC).

Guddoomiyaha Bangiga Dhexe ayaa ku tilmaamay hufnaanta nidaamka lacag-bixinta inay tahay mudnaan dhaqaale iyo istaraatiiji ah oo Soomaaliya u leh muhiimad gaar ah, maadaama xawaaladuhu ay weli yihiin mid ka mid ah ilaha ugu waaweyn ee ay qoysaska Soomaaliyeed ka helaan dakhliga.