Muqdisho (Dawan ) – Dowladda Soomaaliya ayaa qorsheyneysa inay hirgeliso hannaan cusub oo mushahar oo loogu talagalay ciidamada amniga, si loo xoojiyo isla-xisaabtanka iyo maamul-wanaagga, sida uu yiri Wasiirka Gaashaandhigga.
Wasiirka Gaashaandhigga, Axmed Macallin Fiqi, ayaa sheegay in nidaamka cusub uu xiriirin doono bixinta mushaaraadka iyo xaqiijinta billaha ah ee shaqaalaha iyo joogitaanka goobaha shaqo iyo hawlgal.
Wuxuu hadalkan ka jeediyay kulan ka dhacay Muqdisho oo ay ka soo qayb galeen mas’uuliyiin ka tirsan dowladda federaalka, Bangiga Adduunka iyo saaxiibbada caalamka, sida lagu sheegay bayaan ka soo baxay wasaardda.
Kulanka ayaa diiradda lagu saaray dib-u-habeynta hay’adaha amniga, oo ay ka mid yihiin hagaajinta nidaamka shaqaalaha, qandaraasyada, qaab-dhismeedka sharciga iyo hannaanka hawlgabka, sida bayaanka lagu sheegay.