Muqdisho (Dawan) – Dowladda Federaalka Soomaaliya ayaa sheegtay in 18 xubnood oo ka tirsan Al-Shabaab in lagu dilay howlgal duqeyn cirka ah oo 21-kii Luulyo 2026 ka dhacay deegaanka Suullaay ee Gobolka Hiiraan, halka 21 kale lagu dhaawacay.
War-saxaafadeed ka soo baxay Wasaaradda Gaashaandhigga Soomaaliya ayaa lagu sheegay in howlgalka ay si wadajir ah u fuliyeen Ciidanka Xoogga Dalka Soomaaliyeed iyo saaxiibada caalamiga ah.
Duqeynta ayaa lagu beegsaday goobo ay ku sugnaayeen dagaalamayaasha Al-Shabaab ee ku yaalla deegaanka Suullaay, oo qiyaastii 17 kiiloomitir dhanka koonfureed kaga beegan deegaanka Teedaan ee Gobolka Hiiraan.
Wasaaradda Gaashaandhigga ayaa sheegtay in howlgalka lagu burburiyay hal gaari oo dagaal oo ay kooxda adeegsanaysay, sidoo kalena la beegsaday fariisimo iyo dhufeysyo ay Al-Shabaab ka sameysteen deegaanka.
Dowladdu ma aysan shaacin magacyada xubnaha lagu dilay ama lagu dhaawacay howlgalka.