Muqdisho (Dawan) – Dowladda Federaalka Soomaaliya ayaa si kulul u diidday go'aanka ay Israa’iil ugu magacaawday safiir Somaliland, iyadoo ku tilmaantay tallaabadaasi mid si toos ah u jebinaysa madaxbannaanida, midnimada iyo wadajirka dhuleed ee dalka.
War-saxaafadeed rasmi ah oo ka soo baxay Dowladda Federaalka ayaa lagu sheegay in go’aanka Israa’iil uu ka hor imaanayo sharciga caalamiga ah, gaar ahaan Axdiga Qaramada Midoobay iyo mabaadi’da Midowga Afrika, kuwaas oo si cad u aqoonsan Soomaaliya inay tahay dal mideysan oo leh xuduudihiisa caalamiga ah.
Dowladda Soomaaliya ayaa sheegtay inay si buuxda u diidan tahay tallaabo kasta oo lagu siinayo aqoonsi diblomaasiyadeed ama siyaasadeed qayb ka mid ah dhulkeeda oo ka baxsan awoodda dowladda federaalka, iyadoo xustay in Somaliland ay weli tahay qayb ka mid ah Jamhuuriyadda Federaalka Soomaaliya.
“Falkan wuxuu wiiqayaa heshiisyada iyo wadajirka caalamiga ah ee ku saabsan midnimada Soomaaliya,” ayaa lagu yiri war-saxaafadeedka, iyadoo sidoo kale laga digay in tallaabooyinka noocan ah ay carqaladeyn karaan dadaallada lagu xoojinayo dowlad-dhiska, dimuqraadiyadda, iyo la dagaallanka argagixisada.
