Nairobi (Dawan) – Dowladda Soomaaliya ayaa soo bandhigtay barnaamij maalgashi oo dhanka beeraha ah oo ku kacaya $1.38 bilyan, kaas oo lagu soo bandhigay madal heer sare ah oo ka dhacday dalka Kenya, sida ay sheegtay Wasaaradda Beeraha.
Sida ay wasaaraddu sheegtay, barnaamijkan waxa uu ujeedkiisu yahay sare u qaadista wax-soo-saarka cuntada, abuurista fursado shaqo, iyo xoojinta amniga cuntada dalka.
Barnaamijkan, oo loo bixiyay “Somalia’s Legacy Program”, ayaa diiradda lagu saaray iskaashiga maalgashiga cuntada iyo beeraha, sida ay Khamiistii xaqiijisay Wasaaradda Beeraha iyo Waraabka ee Soomaaliya.
Agaasimaha Guud ee wasaaradda, Maxamed Xasan Cabdulle, ayaa sheegay in Soomaaliya ay bixinayso fursado maalgashi oo ballaaran, isagoo tixraacaya kheyraadka dabiiciga ah ee dalka iyo waxa uu ku tilmaamay weji cusub oo u bilowday kobaca dhaqaalaha iyo dadaallada sugnaanta cuntada.
Qorshahan ayaa xoogga saaraya horumarinta lix silsiladood oo qiimo leh, kuwaas oo ay ka mid yihiin, galleyda, sisinta, digirta, liinta, iyo calafka xoolaha, sida ay wasaaraddu sheegtay.
