Muqdisho (Dawan) – Wasiirka Warfaafinta, Dhaqanka iyo Dalxiiska Xukuumadda Federaalka Soomaaliya Cabdulfataax Qaasim Maxamuud ayaa sheegay in Wasaaraddu diyaarinayso habraac lagu nidaaminayo isticmaalka baraha bulshada iyo howlaha la xiriira soo bandhigista dalxiiska Soomaaliya, isagoo ka hadlay Madasha Istiraatiijiyadda Xiriirka Warbaahinta.
Wasiirka ayaa sheegay in baraha bulshada ay yihiin aalado casri ah oo leh faa’iidooyin badan haddii si sax ah loo isticmaalo, balse ay sidoo kale keeni karaan saameyn taban marka loo adeegsado si aan waafaqsanayn dhaqanka, amniga iyo danaha bulshada.
Cabdulfataax Qaasim ayaa sheegay in ujeeddada dowladda ay tahay in la xoojiyo isticmaalka wanaagsan ee warbaahinta dhijitaalka ah, kor loo qaado wacyiga dhalinyarada, isla markaana la dejiyo hannaan lagu hago mustaqbalka warbaahinta casriga ah.
Wasiirka ayaa sidoo kale sheegay in Wasaaraddu ay soo saari doonto habraac ku saabsan hay’adaha iyo dadka ka shaqeeya dalxiiska, gaar ahaan kuwa soo bandhiga muuqaallo iyo xog la xiriirta Soomaaliya, si loo hubiyo in waxyaabaha la baahinayo ay waafaqaan dhaqanka iyo danaha qaranka.
