Soomaaliya oo xaqiijisay in la dilay hoggaamiye sare oo ka tirsan Al-Shabaab

Muqdisho (Dawan)– Dowladda Federaalka Soomaaliya ayaa maanta oo Isniin ah sheegtay inay xaqiijisay geerida Macallin Jinaw Ibraahim, oo ay ku tilmaantay hoggaamiye sare oo ka tirsanaa Al-Shabaab, kaas oo lagu dilay duqeyn dhanka cirka ah oo dhacday horraantii bishan.

Wasiirka Gaashaandhigga Soomaaliya, Axmed Macallin Fiqi, ayaa shir jaraa’id oo uu qabtay ku sheegay in howlgalka lagu dilay Macallin Jinaw uu dhacay 5-tii Luulyo, kaddib howlgal sirdoon oo socday 14 maalmood, kaas oo ay ciidamada sirdoonka Soomaaliya ku raad-joogeen.

Wasiirku wuxuu sheegay in howlgalka ay ka qeyb qaateen saaxiibbada caalamiga ah, isla markaana Macallin Jinaw Ibraahim lagu dilay tuulada Sabiyo, oo u dhexeysa degmooyinka Afgooye iyo Basra ee gobolka Shabeellaha Hoose, xilli uu kulan kula jiray xubno kale oo ka tirsan Al-Shabaab goob miyiga ah.

Sida uu sheegay Fiqi, Macallin Jinaw Ibraahim wuxuu ka tirsanaa Al-Shabaab tan iyo markii la aasaasay kooxda, wuxuuna xubin ka ahaa Golaha Shuurada, oo ah hay’adda go’aannada istaraatiijiga ah ee kooxda.

Wasiirka ayaa sidoo kale sheegay in Macallin Jinaw uu ahaa la-taliye sare oo ku dhow hoggaamiyaha Al-Shabaab, Axmed Diiriye (Abuu Cubeyda), isla markaana uu door ku lahaa hagidda weerarrada, ururinta waxa dowladda ay ku sheegtay canshuuraha sharci-darrada ah iyo isku dubbaridka qorista dagaalyahannada.

Fiqi ayaa ku eedeeyay Macallin Jinaw inuu door ku lahaa weerarro iyo howlgallo ka dhacay gobollada Baay, Bakool, Galgaduud iyo Hiiraan, isagoo sheegay in odayaal iyo waxgarad ku nool Baay iyo Bakool ay dowladda marar badan ka codsadeen in tallaabo laga qaado, iyagoo ku eedeeyay inuu ku lug lahaa rabshado iyo askareyn qasab ah.

Wasiirka Gaashaandhigga ayaa sheegay in dowladda ay dib u dhigtay shaacinta howlgalka ilaa laga xaqiijinayay geerida Macallin Jinaw Ibraahim. Dowladda Soomaaliya ayaa sanadihii u dambeeyay xoojisay howlgallada ka dhanka ah Al-Shabaab, iyadoo taageero ka heleysa saaxiibbada caalamiga ah, kuwaas oo isugu jira howlgallo dhulka ah iyo duqeymo dhanka cirka ah oo lagu bartilmaameedsanayo hoggaanka iyo xarumaha kooxda.

Soomaaliya oo xaqiijisay in la dilay hoggaamiye sare oo ka tirsan Al-Shabaab

IGAD oo Muqdisho ka daahfurtay mashruuc lagu xoojinayo ka qaybgalka haweenka ee nabadda

Maxay tahay farriinta Madaxweynaha Soomaaliya ee Ra’iisul Wasaaraha cusub ee Ingiriiska?

Soomaaliya oo Turkiga ka heshay 10 aqal-beereed si kor loogu qaado wax-soo-saarka beeraha

Tababar diblomaasiyadeed oo loo qabtay qaar ka mid ah shaqaalaha dowladda

Maqaallo La Xidhiidha

Imisa ayay gaartay hantida Bangiga Shabeelle ee Itoobiya?

Maxay yihiin ballanqaadyada musharraxa Xisbiga JSP ee Galmudug?

Jabuuti oo bilowday dib-u-habayn lagu horumarinayo nidaamka gudbinta bukaannada

Qaybaha

Qoraallo Cusub

IGAD oo Muqdisho ka daahfurtay mashruuc lagu xoojinayo ka qaybgalka haweenka ee nabadda

Maxay tahay farriinta Madaxweynaha Soomaaliya ee Ra’iisul Wasaaraha cusub ee Ingiriiska?

Soomaaliya oo Turkiga ka heshay 10 aqal-beereed si kor loogu qaado wax-soo-saarka beeraha