Soomaaliya, 16 Nofeembar 2025 — Hay’adda Socdaalka iyo Jinsiyadda Soomaaliya (HSJ) ayaa xaqiijisay “isku day jabsasho sharci-darro ah oo dambiyeed” oo lagu qaaday qaybo ka mid ah nidaamka dal-ku-galka elektarooniga ah ee dalka (eTAS), taas oo keentay in dowladda ay bilowdo xaalad-degdeg ah oo amniga dijitaalka ah lagu xakameynayo, islamarkaana ay furto baaritaan heer qaran ah.
War-saxaafadeed ay axaddii soo saartay, hay’addu waxay sheegtay inay qaadday “tallaabooyin degdeg ah” si loo xaddido saameynta arrinta oo loo qiimeeyo khatarta ka dhalan karta xogta rakaabka. Dowladda Federaalka ayaa sheegtay inay magacaawday guddi heer sare ah oo baaritaan, ka kooban hay’adaha amniga, khubaro farsamada dambiga dhijitaalka ah , iyo hay’adaha dowliga ah ee ku shaqada leh ilaalinta xogta.
Guddiga ayaa baaraya sida isku dayga jabsashada loo sameeyay, halka uu ka yimid, iyo inta uu le’egyahay saameyntu, sida HSJ ay shaacisay. Warbixin dhammeystiran ayaa la soo saari doonaa marka baaritaanka la soo gabagabeeyo.