Spain mise Argentina: Yaa ku guuleysan doona Koobka Adduunka?

New York (Dawan)- Koobka Adduunka ee FIFA 2026 ayaa gaaray kulankiisi ugu dambeeyay, waxaana ciyaarta kama dambaysta ah foodda is dari doona laba ka mid ah xulalka ugu xooggan kubadda cagta dunida: Argentina oo haysata koobka adduunka iyo Spain oo ah horyaalka Yurub isla markaana hoggaamineysa qiimeynta FIFA.

Inkasta oo Faransiiska loo arkayay xulka ugu cadcad hanashada koobka, halka England-na ay soo bandhigtay mid ka mid ah bandhigyadeedii ugu fiicnaa tobannaan sano, haddana Argentina iyo Spain ayaa xaqiijiyay inay mudan yihiin inay gaaraan finalka, kaddib dadaal adag oo ay muujiyeen inti uu socday tartanka.

Argentina ayaa ciyaareysa Koobkeedii Adduunka ee 18-aad tan iyo markii ay markii ugu horreysay ka qayb gashay sanadkii 1930. Waxay hore ugu guuleysatay koobka saddex jeer, sannadihii 1978, 1986 iyo 2022.

Intii ay ka qaybgalaysay Koobabka Adduunka, Argentina waxay ciyaartay 94 kulan, iyadoo badisay 53, barbaro gashay 17, halka laga adkaaday 24 jeer. Waxay dhalisay 171 gool, waxaana laga dhaliyay 103 gool, iyadoo hadda ku jirta kaalinta saddexaad ee qiimeynta FIFA.

Inkasta oo heerka ay ku soo gaartay tartankan aanu la mid ahayn kii ay ku guuleysatay koobkii 2022, haddana khibradda Lionel Messi ayaa weli laf-dhabar u ah xulka tababare Lionel Scaloni.

Messi oo 39 jir ah ayaa dhaliyay siddeed gool, wuxuuna caawiyay afar kale . Waxa uu taageero xooggan ka helayaa khadka dhexe oo ay ka kooban yihiin Enzo Fernández, Alexis Mac Allister iyo Leandro Paredes, kuwaas oo si weyn u ilaaliya isku dheelitirka kooxda.

Si kastaba ha ahaatee, ku tiirsanaanta Messi ayaa loo arkaa tabarta ugu weyn ee Argentina, maadaama maqnaanshihiisu si weyn u wiiqi karo awoodda kooxda, inkasta oo ay haystaan weeraryahanno tayo leh sida Julián Álvarez, Lautaro Martínez iyo Giuliano Simeone.

Argentina waxay finalka timid iyadoo aan laga badin tan iyo guuldarradii ay Ecuador kala kulantay isreeb-reebka Koobka Adduunka, kadib waxay gaartay 14 guul oo xiriir ah.

Wareegga guruubyada waxay dhalisay siddeed gool iyadoo laga dhaliyay hal gool oo keliya. Wareegyada is reeb-reebka waxay 3-2 ku garaacday Cape Verde iyo Masar, 3-1 ayay waqti dheeri ah uga badisay Switzerland, halka ay 2-1 uga soo gudubtay England ciyaartii nus-dhamaadka, iyadoo kasoo laabatay gool looga hormaray.

Dhinaca kale, Spain ayaa ka qaybgaleysa Koobkeedii Adduunka ee 17-aad. Waxay ku guuleysatay koobka hal mar oo keliya sanadkii 2010, waxayna taariikh ahaan ciyaartay 74 kulan oo Koobka Adduunka ah, iyadoo badisay 37, barbaro gashay 18, lagana adkaaday 19 kulan. Waxay dhalisay 121 gool, waxaana laga dhaliyay 76.

Spain waxay finalka timid iyadoo ka soo kabatay niyad-jabkii labadii koob ee adduun ee ugu dambeeyay, waxa ayna hiigsaneysaa inay mar labaad isku darsato koobabka Yurub iyo Adduunka.

Inkasta oo Lamine Yamal iyo Nico Williams ay hormuud u ahaayeen guushii Euro 2024, haddana labada ciyaaryahan ma aysan soo bandhigin heerarkoodii cajiibka ahaa intii uu socday Koobka Adduunka. Yamal wuxuu tartanka ku galay dhaawac muruqa ah, halka Nico Williams uu inta badan kursiga keydka kasoo muuqday.

Si kastaba ha ahaatee, Spain waxay muujisay difaac adag, iyadoo hal gool oo keliya laga dhaliyay intii uu socday tartanka. Xulkan ayaa sii wata qaab-ciyaareedkiisi ku dhisnaa kubbad haysashada iyo baasaska gaagaaban, iyadoo Rodri iyo Fabián Ruiz ay maamulayan khadka dhexe.

Waxaa jira aragti ah in xawaaraha kubbad wareejinta Spain uu yara gaabis yahay marka loo eego sannadihii hore, taas oo u sahashay kooxaha kale inay yareeyaan halista weerar Spaian

Spain waxay tartanka ku billowday barbaro goolal la'aan ah oo ay la gashay Cape Verde, ka hor inta aysan 4-0 ku garaacin Sacuudiga iyo 1-0 ay uga badisayUruguay. Wareegyadii xigay waxay 3-0 ku reebtay Austria, si dirqi ah ayay uga soo gudubtay Portugal iyo Belgium, halka ay ugu dambeyn ka adkaatay France si ay u gaarto finalka.

Xulka Spain wuxuu finalka soo gaaray isagoo aan laga adkaan 37 kulan oo xiriir ah. Guuldarradii ugu dambeysay waxay ahayd ciyaar saaxiibtinimo oo ay Colombia kaga adkaatay bishii Maarso 2024, halka guuldarradii ugu dambeysay ee rasmi ah ay ahayd middii Scotland ee isreeb-reebkii Euro 2024 bishii Maarso 2023.

Inkastoo Lamine Yamal hal gool oo keliya dhaliyay tartankan, Nico Williams-na uusan weli shabaqa soo taaban, haddana saadaasha falanqeeyayaasha ayaa muujineysa in midkood uu door muhiim ah ka ciyaari karo finalka.

Marka la eego tirokoobyada, qaab-ciyaareedka iyo safarka ay soo mareen labada xul, finalka Koobka Adduunka 2026 wuxuu noqonayaa mid si weyn loogu loollamo, iyadoo Argentina ay raadineyso difaacashada koobka, halka Spain ay dooneyso inay dib ugu soo laabato carshiga kubadda cagta adduunka.