Tartamayaal ka socday 11 dal oo ku baratamay tartanka Quraanka Jabuuti

Jabuuti (Dawan ) – Tartamayaal ka socday 11 dal oo ka kala yimid Afrika iyo Bariga Dhexe ayaa ka qaybgalay tartanka 26-aad ee xifdinta Quraanka Kariimka oo lagu qabtay magaalada Jabuuti.

Tartankan sannadlaha ah oo hadda 26 sano jirsaday ayaa soo jiita dhalinyaro badan oo xifdisan Quraanka Kariimka, kuwaas oo ka kala yimaada dalal badan oo gobolka ah.

Dalalka sanadkan ka qaybgalay waxaa ka mid ahaa Itoobiya, Soomaaliya, Yemen, Suudaan, Kenya, Uganda, Tanzania, Comoros, Rwanda, Burundi iyo Koonfurta Suudaan.

Xafladda abaalmarinta ayaa lagu qabtay qasriga Madaxtooyada Jabuuti, halkaas oo Madaxweyne Ismaaciil Cumar Geelle uu abaalmarinno guddoonsiiyay ku guuleystayaasha tartanka.

Tartanka ayaa loo qabtay saddex qaybood oo kala ah xifdinta 10-ka jus ee ugu horreeya Quraanka Kariimka, xifdinta 20-ka jus, iyo xifdinta Quraanka Kariimka oo dhan.

Ku guuleystayaasha tartanka sanadkan waxaa ka mid ahaa Xoosh Rooble Gaddi oo u dhashay Jabuuti iyo Badri Cabdalla Aydoran oo u dhashay Yemen, kuwaas oo si wadajir ah ugu guuleystay qaybta xifdinta Quraanka Kariimka oo dhan.

Qaybta xifdinta 20-ka Jus waxaa ku guuleystay Xasan Cali Xuseen oo u dhashay Soomaaliya, halka qaybta 10-ka jus ee ugu horreeya uu ku guuleystay Axmed Maxamed Sabri oo u dhashay Kenya.

Tartanka xifdinta Quraanka Kariimka ee Jabuuti ayaa la bilaabay sanadkii 2000, waxaana lagu tilmaamaa mid ka mid ah barnaamijyada diimeed ee ugu waaweyn gobolka, iyadoo ujeeddadiisu tahay kor u qaadista qiimaha Islaamka iyo dhiirrigelinta dhalinyarada ku dadaasha barashada iyo xifdinta Quraanka Kariimka.