Ankara (Dawan)– Baarlamaanka Turkiga ayaa ansixiyay qaraar lagu kordhinayo muddo laba sano ah oggolaanshaha ciidamada Turkiga uga hawlgeli karaan Soomaaliya, iyadoo muddada cusub ay bilaabaneyso 27-ka Luulyo 2026, kuna egaaneyso 27-ka Luulyo 2028.
Qaraarka, oo uu Madaxweynaha Turkiga Recep Tayyip Erdoğan u gudbiyay Baarlamaanka ayaa lagu sheegay in amniga iyo xasilloonida Soomaaliya ay muhiim u yihiin nabadgelyada iyo xasilloonida gobolka, gaar ahaan Gacanka Cadmeed, Badda Carabta iyo Badweynta Hindiya.
Sida ku cad qaraarka, ciidamada Turkiga ayaa sii wadi doona taageerada ay siiyaan Soomaaliya ee dhinacyada amniga iyo difaaca, iyagoo ka qeyb qaadanaya la-dagaallanka Al-Shabaab iyo Daacish, burcad-badeedda, kalluumeysiga sharci-darrada ah, tahriibka iyo khataraha kale ee saameeya amniga gobolka.
Dowladda Turkiga ayaa sheegtay in joogitaanka ciidamadaasi uu ku saleysan yahay codsi rasmi ah oo uga yimid Dowladda Federaalka Soomaaliya, isla markaana uu qeyb ka yahay heshiisyada iskaashiga difaaca, amniga iyo dhaqaalaha ee labada dal.
Qaraarka ayaa sidoo kale dhigaya in ciidamada Turkiga ay ka howlgeli karaan dhulka Soomaaliya iyo aagagga badda ee ay labada dowladood si wadajir ah u cayimaan. Tirada ciidamada, qalabka ay adeegsan doonaan iyo goobaha ay ka howlgalayaan waxaa go'aamin doona Madaxweynaha Turkiga.