UNDP oo shaacisay natiijooyinka mashruuca biyo-gelinta bulshooyinka miyiga Soomaaliya

Muqdisho (Dawan) — Barnaamijka Horumarinta Qaramada Midoobay (UNDP) ayaa shaaciyay in 36,000 oo qof ay ilaa hadda ka faa’iidaysteen mashruuc biyo-gelineed oo uu ka fulinayo Soomaaliya, kaas oo la doonayo inuu gaarsiiyo adeegyada biyaha 120,000 oo qof.

Mashruuca Helitaanka Biyo Joogto ah ee Bulshooyinka Miyiga waxaa maalgelinaya Sanduuqa Horumarinta Sacuudiga, waxaana uuna isagu jiraa qodista ceelal cusub iyo dhisidda nidaam maamul oo ay bulshadu hoggaamiso, si loo xaqiijiyo joogtaynta adeegyada biyaha.

UNDP ayaa sheegtay in saddex ceel-biyood la dhammaystiray sannadkii 2025, halka toddoba ceel oo kale loo qorsheeyay in la dhammaystiro sannadka 2026, taas oo tirada guud gaarsiinaysa 10 ceel oo uu mashruucu hiigsanayo.

Qoraal ay hay’addu ku baahisay baraha bulshada ayay ku sheegtay in dhismaha kaabayaasha biyuhu uusan keligiis dammaanad qaadi karin joogtaynta adeegyada, balse ay muhiim tahay in bulshada deegaanka ay si buuxda ula wareegto mas’uuliyadda maamulkooda.

Hay’addu waxay sheegtay in kulamo wadatashi ah lala yeeshay bulshada ku nool deegaannada Inagabile, Gadoon, Haadweyne, Yeed iyo Qaloocato, si dadka deegaanka ay door toos ah ugu yeeshaan go’aannada la xiriira maamulka ilaha biyaha.

Ceel kasta oo cusub waxaa loo sameeyay guddi maamul oo la siiyay hagitaan ku saabsan waajibaadkiisa iyo shaqadiisa. UNDP ayaa sidoo kale sheegtay in la qorsheeyay tababarro ku saabsan hawlgelinta iyo dayactirka ceelasha, si loo xoojiyo awoodda bulshada ee maaraynta iyo joogtaynta adeegyada muddada dheer.

Sanduuqa Horumarinta Sacuudiga ayaa mashruuca ku maalgelinaya laba milyan oo doollar, waxaana iska kaashanaya UNDP iyo Wasaaradda Tamarta iyo Kheyraadka Biyaha ee Dowladda Federaalka Soomaaliya, sida ay hay’addu sheegtay markii mashruuca lagu dhawaaqay bishii Febraayo 2025.

Ceelasha ayaa ku shaqeeya tamarta qorraxda, waxaana markii mashruuca la shaacinayay la qorsheeyay in la dhammaystiro bisha Diseembar 2026. Sidoo kale, in ka badan saddex milyan oo qof ayaa la filayaa inay si dadban uga faa’iidaystaan mashruuca. UNDP ma aysan sheegin xilliga saxda ah ee la dhammaystirayo toddobada ceel ee harsan.

UNDP oo shaacisay natiijooyinka mashruuca biyo-gelinta bulshooyinka miyiga Soomaaliya

Eritrea oo Quwado Shisheeye ku Eedeysay Hubeynta RSF-ta Suudaan

Jabuuti oo 112,000 oo Doollar ku Maalgelinaysa 15 Mashruuc oo Bulsho

Jabuuti oo billad qalin ah ka heshay Tartanka Dabaasha ee Bariga Afrika

Shiinaha iyo Jabuuti oo ku baaqay sugidda amniga maraakiibta Badda Cas iyo Gacanka Cadmeed

Maqaallo La Xidhiidha

Askari dilay madaxii hore ee Isgaarsiinta Booliiska oo dil lagu xukumay

Soomaaliya iyo UNICEF oo ka shiray dardargelinta mashaariicda biyaha iyo fayadhowrka

IOM oo ka digtay in fatahaaduhu barakicin karaan 874,000 oo qof oo Soomaaliya ku nool