Waa kuma xildhibaannada Waqooyi Bari ee xasaanadda laga xayuubiyay?

Laascaanood (Dawan)– Baarlamaanka Dowlad Goboleedka Waqooyi Bari ayaa maanta xasaanadda ka qaaday shan xildhibaan, kaddib markii goluhu cod u qaaday soo jeedin ku saabsan in xasaanadda laga qaado xubnahaasi.

Sida lagu sheegay qoraal uu baahiyay Telefishinka Dowlad Goboleedka Waqooyi Bari, go’aanka waxaa taageeray 57 xildhibaan, kuwaas oo la sheegay inay heleen aqlabiyadda saddex-meelood laba (2/3) ee loo baahan yahay, sida ku xusan Qodobka 9-aad ee xeer-hoosaadka Golaha.

Xildhibaannada xasaanadda laga qaaday ayaa kala ah; Makhtal Saciid Maxamuud, Cabdisalaan Cabdullaahi Cabdiraxmaan, Sadiiq Jaamac Muuse, Axmed Cali Maxamed iyo Axmed Caabi Xasan.

Maamulka Waqooyi Bari ayaa xubnahan ku eedeeyay inay ka weecdeen mowqifkii iyo aragtidii siyaasadeed ee lagu dhisay Dowlad Goboleedka Waqooyi Bari. Hase yeeshee, xildhibaannada laftooda ama dhinacyada ay khuseyso warbixintan kama aysan soo saarin wax jawaab ah oo ku saabsan eedeymaha loo jeediyay.

Go’aankan ayaa kusoo beegmaya xilli Baarlamaanka Waqooyi Bari uu dhawaan xasaanadda ka qaaday Xildhibaan Fahiima Yuusuf Cabdillaahi (Fahiima Quuje), kaddib markii ay sheegtay inay ka baxday maamulka Waqooyi Bari isla markaana ay dib ugu laabtaySomaliland.

Tallaabadan ayaa muujinaysa khilaafka siyaasadeed ee la xiriira jihada iyo mowqifyada siyaasadeed ee maamulka Waqooyi Bari, iyadoo go’aanka Baarlamaanku uu dhaliyay su’aalo ku saabsan mustaqbalka shanta xildhibaan ee xasaanadda laga qaaday iyo doorkooda siyaasadeed.