Waqooyi Bari oo taageertay go’aankii lagu buriyay heshiisyadii Imaaraadka

Laascaanood (Dawan) – Dowlad Goboleedka Waqooyi Bari ee Soomaaliya ayaa maanta oo Talaado ah ku dhawaaqday inay si buuxda u taageersan tahay go’aankii Dowladda Federaalka Soomaaliya ay ku laashay dhammaan heshiisyadii ay la gashay Isutagga Imaaraadka Carabta, gaar ahaan kuwa la xiriira dekedaha iyo iskaashiga amniga.

Bayaan rasmi ah oo ka soo baxay Waqooyi Bari ayaa lagu adkeeyay in Soomaaliya tahay dal madax-bannaan, midaysan, isla markaana aan la kala qaybin karin, iyadoo mar kale la xaqiijiyay in dhammaan dhulka iyo dekedaha dalka, oo ay ku jirto dekedda Berbera, ay hoos yimaadaan awoodda dowladda federaalka.

Dowlad Goboleedka Waqooyi Bari ayaa sheegtay in uusan jirin maamul goboleed leh awood sharciyeed oo uu si madax-bannaan ula macaamilo dowlado shisheeye ama ku geli karo heshiisyo caalami ah, haddii uusan jirin oggolaansho iyo wada-tashi ka yimaada Dowladda Federaalka Soomaaliya.

“Isku dayada lagu hareer marayo awooddaas waa kuwo sharci-darro ah, xasillooni-darro horseedaya, kana soo horjeeda nidaamka dastuuriga ah ee Soomaaliya iyo nidaamka federaalka," ayaa lagu yiri bayaanka.

Hadalkan ayaa imanaya xilli Somaliland ay mar kale ku celisay inay sii wadi doonto iskaashiga ay la leedahay Imaaraadka Carabta, isla markaana ay diidday go’aanka dowladda federaalka, iyadoo ku tilmaantay mid aan khusayn. Somaliland ayaa ku doodday in heshiisyada ay la gashay Imaaraadka ay yihiin kuwo sharci ah oo ansax ah.

Si kastaba ha ahaatee, Dowlad Goboleedka Waqooyi Bari ayaa sheegtay in doodahaasi yihiin kuwo aan sal sharci iyo dastuur toona lahayn, islamarkaana aan wax miisaan ah ku lahayn sharciga qaranka, kan gobolka iyo kan caalamiga ah.

Arrintan ayaa kusoo beegmaysa kadib markii Golaha Wasiirrada Soomaaliya ay si rasmi ah u shaaciyeen baabi’inta dhammaan heshiisyadii lala galay Imaaraadka Carabta, oo ay ku jiraan kuwa quseeya dekedaha Berbera, Boosaaso iyo Kismaayo, iyo heshiisyadii amniga iyo difaaca. Dowladda federaalka ayaa sheegtay in tallaabadan looga gol-leeyahay ilaalinta madax-bannaanida, midnimada dhuleed, iyo nidaamka dastuuriga ah ee dalka.