Muqdisho (Dawan) — Wasaaradda Qorsheynta, Maalgashiga iyo Horumarinta Dhaqaalaha ayaa maanta magaalada Muqdisho ku daahfurtay Qaab-dhismeedka iyo Nidaamka Danabeysan ee Kormeerka iyo Qiimeynta Qorshaha Isbeddelka Qaranka, kaas oo loogu talagalay in lagu casriyeeyo habka dowladda u qorsheyso, ula socoto, uguna qiimeyso waxqabadkeeda. Munaasabadda waxaa ka qeyb galay mas'uuliyiin ka socday dowlad-goboleedyada, agaasimayaasha guud ee wasaaradaha federaalka iyo bahwadaagta dowladda.
Nidaamka cusub ayaa ujeeddadiisu tahay in la mideeyo habka qiimeynta qorshayaasha dowladda, iyadoo la doonayo in dhammaan 26-ka wasaaradood ee dowladda federaalka ay yeeshaan hannaan isku xiran oo ay ku wadaagaan xogta, uguna cabbiraan horumarka ay ka sameeyeen qorshayaashooda.
Wasaaradda Qorsheynta ayaa sheegtay in Qorshaha Isbeddelka Qaranka uu sanadihii u dambeeyay dib u eegis ku sameeyay in ka badan 153 mashruuc oo ay maalgelinayeen hay'adaha caalamiga ah. Dowladda ayaa hadda qorsheyneysa in isla habkan lagu ballaariyo dabagalka iyo qiimeynta dhammaan mashaariicda dowladda.
Wasiirka Qorsheynta, Maalgashiga iyo Horumarinta Dhaqaalaha, Maxamuud Cabdiraxmaan Beenebeene, ayaa sheegay in nidaamkan lagu soo shaqeynayay muddo ku dhow hal sano, wuxuuna yiri:
