Ankara (Dawan)- Wasiirka Arrimaha Dibadda Turkiga, Hakan Fidan ayaa maanta oo Khamiis ah magaalada Ankara ee caasimadda dalka Turkiga ku qaabilay ku-simaha Wasiirka Arrimaha Dibadda Soomaaliya Cali Maxamed Cumar.
Kulankaan oo ahaa mid ay albaabadu u xiranyihiin lagama helin, wax faahfaahin ah.
Warbaahinta rasmiga ee Soomaaliya waxa ay ku gaabsatay in ay kawada hadleen xoojinta iskaashiga ka dhaxeeya labada dal iyo xaaladda Gobolka.
ku-simaha Wasiirka Arrimaha Dibadda Soomaaliya Cali Maxamed Cumar ayaa safaro ku bixinaya qaar ka mid ah Dowladaha caalamka gaar ahaan kuwa saaxibka dhaw la ah Soomaaliya si taageero buuxa loogu helo ka hor tagga heshiiska Badda ee ay Itoobiya la gashay Somaliland.
Xiriirka Soomaaliya iyo Turkiga ayaa xoogeystay tan iyo markii uu Erdogan booqasho ku yimid Muqdisho sannadkii 2011-ka, isaga oo ahaa xilligaas Ra’iisul Wasaare.