Xamse oo ka degay Laascaanood oo la adkeeyay amnigeeda

Laascaanood (Dawan)— Ra’iisul Wasaaraha Xukuumadda Federaalka Soomaaliya, Xamse Cabdi Barre, ayaa maanta gaaray magaalada Laascaanood, oo ah xarunta Dowlad-goboleedka Waqooyi Bari ee Soomaaliya, halkaas oo uu kaga qeyb galayo xafladda caleema-saarka madaxda maamulka cusub.

Ra’iisul wasaaraha iyo wafdigiisa waxaa garoonka diyaaradaha ku soo dhaweeyay Madaxweynaha Dowlad-goboleedka Waqooyi Bari, Cabdulqaadir Axmed Aw-Cali (Firdhiye), xubno ka tirsan golaha maamulka, masuuliyiin heer federaal iyo dowlad-goboleed ah, iyo qeybaha kala duwan ee bulshada.

Safarka Xamse Cabdi Barre ee Laascaanood ayaa la xiriira ka qeybgalka munaasabadda caleema-saarka Madaxweynaha Dowlad-goboleedka Waqooyi Bari iyo ku xigeenkiisa, xilli uu maamulkaasi si rasmi ah u bilaabayo mas'uuliaydiisa hoggaamineed ee cusub.

Ra’iisul wasaaraha ayaa horay u booqday magaalada Laascaanood xilligii ay socotay qabanqaabada dhismaha maamulka Waqooyi Bari, gaar ahaan marxaladihii doorashada iyo dhameystirka hay’adaha dowlad-goboleedka, kaasi oo noqday dowlad goboleedki ugu dambeeyay ee ku biira nidaamka federaalka dalka.

Dhanka ammaanka, magaalada Laascaanood ayaa si weyn loo adkeeyay, iyadoo xubno badan oo ka tirsan xukuumadda federaalka ay halkaasi horey u gaareen. Maamulka Waqooyi Bari ayaa soo saaray go’aan lagu adkeynayo amniga, kaas oo sababay in guud ahaan la joojiyo isu-socodka magaalada muddo laba maalmood ah, si loo xaqiijiyo nabadgelyada munaasabadaha socda.