Muqdisho (Dawan) – Madaxweynaha Soomaaliya Xasan Sheekh Maxamuud ayaa sheegay in dib-u-dhacyada ku yimid doorashooyinka dalka aysan salka ku hayn go’aanno siyaasadeed, balse ay ka dhasheen caqabado farsamo iyo khibrad yari.
Wareysi uu Madaxweynahu siiyay barnaamijka Miizaan Podcast ee ka baxa Dawan ayuu ku sheegay in Soomaaliya ay weli dib u dhisanayso khibraddii iyo awooddii loo baahnaa si loo qabto doorashooyin qof iyo cod ah.
Madaxweynaha ayaa sheegay in Soomaaliya aysan qaban doorasho qof iyo cod ah muddo tobannaan sano ah.
Waxa uu xusay in hay’adaha doorashada ay hadda wajahayaan shaqo cusub oo u baahan waqti, khibrad iyo dhaqaale dheeraad ah.
“Doorashadan qof iyo codka ah waxaa ugu dambeysay Soomaaliya ku dhawaad lixdan sano kahor,” ayuu yiri.
Xasan Sheekh ayaa sheegay in markii guddiga doorashada la dhisay ay dejiyeen jadwal iyo miisaaniyad, balse markii hawsha la guda galay ay soo baxeen duruufo cusub.
Waxa uu tilmaamay in kharashaadka iyo baahiyaha farsamo ay ka bateen kuwii markii hore la qorsheeyay.
