Muqdisho (Dawan ) – Madaxweynaha Jamhuuriyadda Federaalka Soomaaliya, Xasan Sheekh Maxamuud, iyo Madaxweynaha Dowlad-goboleedka Hirshabeelle, Cali Cabdullaahi Xuseen (Cali Guudlaawe), ayaa yeeshay kulan gaar ah oo lagu sheegay in ay ku heshiiyeen qorshaha siyaasadeed oo la xiriira mustaqbalka hoggaanka Hirshabeelle.
Kulanka oo ka dhacay magaalada Muqdisho ayaa diiradda lagu saaray xasillinta siyaasadda iyo dib-u-habaynta maamulka Hirshabeelle. Agaasimaha Warfaafinta Madaxtooyada Hirshabeelle, Maxamed Shuuriye Nuur, ayaa sheegay in labada dhinac ay isla garteen in Cali Guudlaawe mar kale loo doorto madaxweynaha Hirshabeelle marka la gaaro doorashooyinka soo socda, taas oo ka dhigan in uu noqonayo musharaxa xisbiga talada haya ee Caddaaladda iyo Wadajirka.
Wararka ka imanaya Madaxtooyada Hirshabeelle ayaa tilmaamaya in wada-hadallada ay ku soo dhammaadeen jawi “guul leh,” isla markaana ay qeyb ka yihiin dadaallo lagu xoojinayo dowlad-dhiska iyo iskaashiga dowladda dhexe iyo dowlad-goboleedyada.