Muqdisho (Dawan) – Madaxweynaha Soomaaliya Xasan Sheekh Maxamuud ayaa difaacay doorka dowladda Turkiga ee sahminta shidaalka Soomaaliya, isaga oo sheegay in Soomaaliya ay la shaqeynayso cid kasta oo diyaar u ah inay maalgashi ku sameyso kheyraadka dalka.
Wareysi uu Madaxweynahu siiyay barnaamijka Miizaan Podcast ee ka baxa Dawan ayuu kaga jawaabay su’aalo la xiriiray sababta Turkiga loogu doortay howlaha sahminta shidaalka, iyadoo ay jiraan shirkado caalami ah oo waaweyn oo khibrad dheer u leh arrimaha shidaalka.
Madaxweynaha ayaa diiday aragtida ah in Soomaaliya ay sugto xasillooni siyaasadeed oo buuxda ka hor inta aan la bilaabin ka faa’iidaysiga kheyraadka dabiiciga ah.
Waxa uu sheegay in siyaasaddu mar walba ay la socoto dood iyo tartan, isla markaana aysan jirin dal dimoqraadi ah oo siyaasaddiisu gebi ahaanba xasilloon tahay.
Xasan Sheekh ayaa sheegay in dadka dhaliilaya heshiiska Turkiga ay soo bandhigaan shirkado kale oo diyaar u ah inay maalgashi ku sameeyaan shidaalka Soomaaliya.
“Yaa kale oo na raba?” ayuu yiri Madaxweynaha, isaga oo xusay in Soomaaliya ay leedahay boqolaal blok oo badeed oo la rumeysan yahay inay ku jiraan shidaal iyo gaas.
Waxa uu sheegay in dowladihii uu hoggaaminayay ay bixiyeen 12 blok oo shidaal ah, kuwaas oo saddex ka mid ah ay qaateen shirkado Turki ah halka sagaalka kale ay heleen shirkado reer galbeed ah.
