Xisbiga JSP oo buuxiyay xilkii uu banneeyay Odawaa

Muqdisho (Dawan) – Xisbiga Caddaaladda iyo Wadajirka (JSP) ee uu hoggaamiyo Madaxweyne Xasan Sheekh Maxamuud ayaa ku dhawaaqay in isbeddel lagu sameeyay qaab-dhismeedka hoggaankiisa sare, ka dib go’aan ka soo baxay madaxda sare ee xisbiga.

Sida lagu sheegay bayaan rasmi ah, Xuseen Sheekh Maxamuud oo horay u ahaa Xoghayaha ku-xigeenka ayaa loo dallacsiiyay xilka Xoghayaha Guud ee xisbiga, iyadoo la raacayo dastuurka iyo xeer-hoosaadka xisbiga. Xuseen Sheekh Maxamuud ayaa sidoo kale ah La-taliyaha Sare ee Madaxweynaha ee Arrimaha Dastuurka, waana xildhibaan hore oo ka tirsanaa Aqalka Sare.

Dhinaca kale, hoggaanka xisbiga ayaa u magacaabay Xildhibaan Xuseen Maxamed Nuur (Tagweeni) inuu noqdo ku-xigeenka Xoghayaha Guud ee xisbiga. Tagweeni ayaa horay u ahaa Xoghayaha Arrimaha Gudaha iyo Siyaasadda ee xisbiga.

Xisbigu wuxuu ugu hambalyeeyay labada mas’uul xilalka cusub ee loo igmaday, isagoo muujiyay kalsooni buuxda oo uu ku qabo inay waajibaadkooda u gudan doonaan si hufan.

Isbeddelkan ayaa yimid ka dib markii uu dabayaaqadii bishii Maarso 2026 uu iscasilay Xoghayihii Guud ee hore Cabdiraxmaan Odawaa, isagoo xusay inay jiraan “khilaafyo sii kordhaya oo dhanka hoggaanka ah,” taas oo muujisay xiisad ka dhex jirtay xisbiga dhexdiisa.

Isbeddelladan ayaa ku soo beegmaya xilli xisbigu uu isu diyaarinayo doorashooyinka tooska ah, isla markaana uu hiigsanayo xoojinta dhismihiisa hoggaamineed iyo ballaarinta saameyntiisa siyaasadeed ee guud ahaan dalka.