Hargeysa (Dawan)— Laba ka mid ah xisbiyada mucaaradka Somaliland ayaa xukuumadda Madaxweyne Cabdiraxmaan Maxamed Cabdillaahi Cirro ku eedeeyay inay cadaadis ku hayso warbaahinta, kaddib markii la xiray Xasan Saleebaan Haaruun oo loo yaqaan Xasan Galaydh, maamulaha Galaydh Media.
Xisbiyada KULMIYE iyo KAAH ayaa war-saxaafadeedyo ay Arbacadii soo saareen ku cambaareeyay xarigga wariyaha, iyagoo ku tilmaamay dhacdada mid walaac ku abuuraysa xorriyadda saxaafadda iyo xaqa hadalka.
KULMIYE ayaa sheegay in Galaydh laga xiray magaalada Gabiley, kaddibna loo gudbiyay Xarunta Dembi-baarista ee CID-da ee Hargeysa. Xisbigu wuxuu sidoo kale sheegay in wariyuhu ka mid ahaa suxufiyiintii sida cad uga hadlay xarigga wariye kale oo lagu magacaabo Baylood, kaas oo sida KULMIYE sheegay muddo ka badan laba toddobaad xiran.
KULMIYE ma uusan soo bandhigin caddeyn muujinaysa in hadallada Galaydh ee ku saabsan Baylood ay sabab u ahaayeen xariggiisa.
Xisbiga KAAH ayaa isna xarigga ku tilmaamay qayb ka mid ah waxa uu ku sheegay “silsilad tacaddiyo iyo xadgudubyo” oo ku wajahan aamusinta saxaafadda, isaga oo ku eedeeyay xukuumadda talada haysa inay awoodda dowladda u adeegsanayso caburinta codadka dhaliila. KAAH ayaa sheegay in dowladnimadu aysan ku xoog badnaan xarigga wariyeyaasha, balse ay ku xoogaysato ilaalinta sharciga, dulqaadka dhaliilaha iyo oggolaanshaha in bulshada iyo warbaahintu si xor ah u hadlaan.
KULMIYE ayaa ugu baaqay xukuumadda inay sii deyso Xasan Galaydh haddii aanu jirin amar maxkamadeed ama dacwad ciqaabeed oo sharci ah oo sabab u noqonaysa xariggiisa. Waxa uu sidoo kale dalbaday sii deynta Suxufi Baylood, isaga oo xukuumadda ugu baaqay in aan awoodda dowladda loo adeegsan cabsi-gelin, cadaadis ama aamusin ka dhan ah warbaahinta.
