Xoolo-dhaqatada ay abaartu saameysay oo helay lacag caymis ah

Muqdisho (Dawan) – Dowladda Federaalka Soomaaliya ayaa xaqiijisay bixinta lacag dhan $3.88 milyan, taas oo ah lacagta caymiska Takaful ee xoolaha, laguna taageerayo xoolo-dhaqatada Soomaaliyeed ee ay saameeyeen abaaraha ka dhacay qaybo badan oo dalka ka mid ah.

Lacagtan ayaa si toos ah loo gaarsiiyay 17,734 xoolo-dhaqato ah oo hore uga diiwaangashanaa barnaamijka caymiska xoolaha ee DRIVE, kuwaas oo is diiwaangeliyay xilliyadii Gu’ga (April 2025) iyo Dayrta (October 2025).

Dowladdu waxay sheegtay in bixinta lacagta caymiska ay timid kadib markii tusmada abaaraha ee Takaful, oo ku saleysan xogta dayax-gacmeedka, ay xaqiijisay in roob la’aantii ka dhacday xilligii Dayrta (October–December 2025) ay si weyn u baabi’isay dhul-daaqsimeedka gobollo badan oo dalka ka mid ah.

Xoolo-dhaqatadii hore u iibsatay caymiska abaaraha ayaa lacagta si toos ah loogu shubay akoonnadooda moobilka, taas oo fududeysay in si degdeg ah loo gaarsiiyo qoysaska ay saameeyeen xaaladaha abaarta.

Mas’uuliyiintu waxay cadeeyeen in qoysaska helay lacagtan aysan helin kaalmo ama gargaar toos ah, balse ay yihiin dad horey u iibsaday caymiska Takaful, oo ah nidaam caymis ku dhisan mabda’a wadaagga khataraha iyo iskaashiga bulshada.

Caymiska Takaful ee xoolaha ayaa ah nidaam maaliyadeed oo muhiim ah oo lagu xoojinayo adkeysiga dhaqaale ee xoolo-dhaqatada, gaar ahaan xilliyada ay dhacaan abaaraha ama masiibooyinka kale ee saameeya daaqa iyo biyaha.

Barnaamijka DRIVE ayaa qayb ka ah hindise cusub oo ay taageerto World Bank, kaas oo lagu magacaabo AgriConnect, oo diiradda saaraya isku xirka suuqyada xoolo-dhaqatada, adeegyada maaliyadeed, tignoolajiyada, iyo horumarinta xirfadaha.