Galmudug (Dawan) — Xubnaha cusub ee Golaha Wakiillada Dowlad-goboleedka Galmudug, oo ka kooban 89 xildhibaan, ayaa la dhaariyey, kaddib doorashooyin ku salaysnaa nidaamka qof iyo cod, sida uu sheegay Guddoomiyaha Guddiga Madaxa-bannaan ee Doorashooyinka Qaranka iyo Soohdimaha, Cabdi Kariim Axmed Xasan.
Guddoomiyaha oo ka hadlay munaasabadda dhaarinta xildhibaannada ayaa sheegay in doorashadoodu ay tahay tallaabo taariikhi ah oo muujinaysa horumarka uu dalka ka sameeyey hirgelinta nidaamka doorashooyinka dadweynaha. Waxa uu tilmaamay in xildhibaannada cusub, oo ay ku jiraan dhallinyaro badan oo rag iyo dumarba leh, ay ku soo baxeen tartan ay ka qaybgaleen ururro siyaasadeed, halkii lagu soo xuli lahaa nidaamyadii hore ee ku dhisnaa odayaasha dhaqanka iyo heshiisyada siyaasadeed.
Cabdi Kariim ayaa sheegay in ku dhowaad 200,000 oo qof ay codkooda ka dhiibteen doorashooyinka Galmudug, kuwaas oo uu xusay in laba jeer lagu celiyey, isla markaana ay musharraxiintu sameeyeen olole doorasho oo ay taageero kaga raadsanayeen dadweynaha.
