Muqdisho (Dawan) – Xukuumadda Soomaaliya ayaa xakameysay kordhinta shaqaalaha dowladda intii ay joogatay, iyadoo shaqaaleysiinta cusub lagu saleeyay baahida shaqo ee hay’adaha, sida uu sheegay Wasiirka Maaliyadda Biixi Imaan Cige.
“Annaga hadda dowladda intaan joogno, shaqaalaha dowladda koror ma samaynin,” ayuu Biixi ku sheegay wareysi uu siiyay Miizaan Podcast, oo ay baahisay Arbacdii Dawan.
Wasiirku wuxuu sheegay in tirada shaqaalaha dowladda ay ku dhowdahay 10,000 ilaa 11,000 qof, isagoo ku dooday in xukuumadda hadda jirta aysan kordhin tirada shaqaalaha intii ay joogtay. Wuxuu sheegay in Golaha Wasiirradu uu soo saaray go’aanno lagu xakameynayo shaqaaleysiinta hay’adaha dowladda, maadaama hay’adaha qaarkood ay haystaan shaqaale ku filan.
“Maadaama shaqaale ku filan ay hadda hay’adaha dowladda joogaan, waa in aanay siyaasadda noqon qof uun hala shaqaaleesiiyo ee baahida ay abuurto ayaa la aaday.,” ayuu yiri Biixi.
Wuxuu sheegay in shaqaale cusub la qaadan karo marka ay jirto baahi dhab ah, sida marka qof shaqada ka tago oo booskiisa loo baahdo in qof kale lagu beddelo. Laakiin, wuxuu sheegay in xukuumaddu aysan qaadin shaqaale cusub oo si guud loogu kordhinayo tirada shaqaalaha dowladda iyadoo aan jirin baahi shaqo.
Biixi wuxuu sidoo kale ka hadlay shaqaalaha ku-meelgaarka ah, isagoo sheegay in inta badan la qoray xilligii dowladdii hore, ayna qaarkood marin habraacii caadiga ahaa ee shaqaaleysiinta shaqaalaha rayidka ah. Wuxuu sheegay in Dowladda hadda jirta ay samaysay tirokoob rasmi ah oo lagu sameeyay shaqaalahaas, iyadoo la ururiyay xog ku saabsan waxbarashadooda, shaqada ay hayaan iyo xogaha kale ee shaqaalahooda, ayuu sheegay.
Tirokoobka ayaa sidoo kale lagu hubinayay in xogta shaqaalaha iyo mushaharradooda ay is waafaqaan, si looga hortago in qof uu mushahar ku qaato magacyo kala duwan. “Waxii khaladaad ee ku jiray waa laga saaray,” ayuu yiri Biixi.
