Muqdisho (Dawan) – Muranka ku saabsan xirnaanshaha garoonka diyaaradaha Doolow ayaa mar kale soo cusboonaaday, kadib markii Ra’iisul Wasaaraha Soomaaliya, Xamsa Cabdi Barre, uu sheegay in Dowladda Federaalka aysan ka dambeyn xiritaanka garoonkaasi, halka maamulka Jubaland uu si degdeg ah uga jawaabay hadalkaas, isagoo ku eedeeyay dowladda dhexe inay iska indha-tirayso xaaladda jirta.
Ra’iisul Wasaaraha ayaa hadalkan ka sheegay munaasabad ka dhacday magaalada Muqdisho, isagoo caddeeyay in “Dowladda Federaalka aysan mas’uul ka ahayn xirnaanshaha garoonka Doolow,” taas oo si toos ah u taabanaysa muran muddo soo jiitamayay.
Wax yar kadib, Wasiirka Warfaafinta Jubaland, Cabdifitaax Maxamed Mukhtaar, ayaa bartiisa Facebook ku qoray jawaab muujinaysa aragtida Jubaland, taas oo sii xoojisay kala aragti duwanaanta labada dhinac ee ku saabsan cidda mas’uulka ka ah xirnaanshaha garoonka.
Garoonka diyaaradaha Doolow ayaa xirnaa tan iyo 2024, kadib markii khilaaf siyaasadeed oo u dhexeeya Dowladda Federaalka iyo Jubaland uu isu beddelay iska horimaad gacan ka hadal ah, arrintaas oo si weyn u saameysay isu socodka dadka iyo dhaqdhaqaaqa ganacsiga ee gobolka.
