Qaahira (Dawan)- Wasiirrada arrimaha dibadda ee 12 dowladood ayaa si kulul u cambaareeyay go'aanka ay Israa'iil ku dhawaaqday ee ah inay safiir u magacaawday “Somaliland”, iyagoo ku tilmaamay tallaabadaas mid si cad u jebinaysa madaxbannaanida iyo midnimada Jamhuuriyadda Federaalka Soomaaliya.
Dalalka bayaanka si wadajir ah u soo saaray ayaa kala ah Masar, Soomaaliya, Suudaan, Liibiya, Bangladesh, Aljeeriya, Sacuudi Carabiya, Falastiin, Turkiga, Indoneesiya, Pakistan iyo Kuwait.
Wasiirradu waxay muujiyeen diidmo buuxda oo ay ka qabaan dhammaan tallaabooyinka hal dhinac ah ee wax u dhimaya midnimada dowladaha ama hoos u dhigaya madaxbannaanidooda, iyagoo mar kale adkeeyay taageeradooda joogtada ah ee ay u hayaan midnimada, madaxbannaanida iyo wadajirka dhuleed ee Soomaaliya, iyo sidoo kale hay’adaha rasmiga ah ee dowladda Federaalka.
