Muqdisho (Dawan)- Hoggaamiyaha Koonfur Galbeed, Aadan Maxamed Nuur Madoobe, ayaa ku eedeeyay dhinacyo shisheeye oo uusan xusin magacooda inay ku lug leeyihiin xiisadda siyaasadeed iyo dagaallada ka socda deegaannada maamulkaas, isagoo sheegay in qorshaha socda aanu ku koobnayn Koonfur Galbeed oo keliya.
Madoobe ayaa sheegay in xogta ay helayaan ay tilmaamayso in xiisadda laga leeyahay ujeeddo ka ballaaran xaaladda ka jirta maamulka, isla markaana la doonayo in lagu wiiqo dowladnimada Soomaaliya.
“Qorshahan waxaa lagu doonayaa in dowladnimada Soomaaliya oo dhan lagu dumiyo. Horumarka iyo dowladnimada Soomaaliya ka bilaabatay ayaa lagu diiddan yahay, gacmo shisheeye ayaa ku jira,” ayuu yiri Aadan Maxamed Nuur Madoobe.
Hoggaamiyuhu waxa uu sheegay in dhacdooyinka ka socda Koonfur Galbeed ay muujinayaan farsamo cusub oo uu ku tilmaamay in aanay ku koobnayn maamulkaas, balse ay saameyn ku yeelan karto guud ahaan Soomaaliya.
