Amni-darro carqaladeysay qaar ka mid ah goobaha codbixinta Itoobiya

Addis Ababa (Dawan) – Amni-darrada ka jirta qaybo ka mid ah gobollada Oromia iyo Amhara ayaa sababtay in aan codbixin laga qaban 143 goobood oo ka mid ahaa doorashadii guud ee Itoobiya, sida uu sheegay Guddiga Doorashada dalkaas.

Guddoomiyaha Guddiga Doorashada Itoobiya, Melatework Hailu, ayaa sheegtay in inkastoo codbixinta dib looga bilaabay qaar ka mid ah goobihii ay hakadka ku timid, inaan haddana 143 goobood aysan suuragelin in doorashadu ka dhacdo sababo la xiriira xaaladda amni.

Doorashadan ayaa la qorsheeyay in lagu qabto 40,448 goobood oo codbixin ah, iyadoo in ka badan 50 milyan oo qof ay iska diiwaangeliyeen inay codkooda dhiibtaan. Natiijada kama dambaysta ah ee doorashada ayaa la filayaa in lagu dhawaaqo 11-ka Juun.

Doorashada ayaa ku soo beegantay xilli Itoobiya ay weli la tacaalayso caqabado amni oo ka jira gobollo muhiim ah. Gobolka Tigray kama uusan qeybgelin doorashada, halka Oromia iyo Amhara ay muddooyinkii dambe ka jireen dagaallo iyo xiisado amni oo saameeyay xasilloonida dalka.

Si kastaba ha ahaatee, Guddiga Doorashada Itoobiya ayaa sheegay in codbixintu si caadi ah uga dhacday inta badan dalka, iyadoo warbaahinta dowladda ay sheegtay in malaayiin qof ay ka qeybgaleen doorashada.

Hakadka ku yimid 143-ka goobood ee codbixinta ayaa sare u qaaday walaaca ku saabsan ka qeybgalka shacabka ku nool deegaannada ay amni-darradu saameysay iyo saameynta ay arrintani ku yeelan karto kalsoonida doorashada ee gobollada qaar.