Awbare oo laga hirgeliyay kulliyad farsamo oo ay ku baxday $1.35 milyan

Awbare (Dawan) – Dowlad-Deegaanka Soomaalida ayaa degmada Awbare ka furtay Kuliyadda Xirfadaha iyo Farsamada Gacanta ee Maax-Dugsiiye, taas oo lagu dhisay lacag ka badan 218 milyan oo birr, una dhiganta ku dhowaad $1.35 milyan, sida ay baahisay warbaahinta deegaanka.

Madaxweynaha Dowlad Deegaanka, Mustafe Muxummed Cumar, iyo Wasiirka Xafiiska Xirfadaha iyo Shaqo-abuurka, Xuseen Gaydh, ayaa si rasmi ah xarigga uga jaray kuliyadda cusub. Kuliyaddan ayaa ka kooban 21 dhisme, waxayna ku fadhidaa dhul dhan 25 hektar, oo u dhiganta 250,000 oo mitir oo laba jibbaaran.

Mas’uuliyiinta ayaa sheegay in kuliyaddu ay sanad kasta waxbarasho iyo tababaro xirfadeed siin doonto ilaa 1,500 arday, kuwaas oo baran doona qeybaha kala duwan ee xirfadaha iyo farsamooyinka gacanta.

Kuliyadda cusub ayaa leh kaabayaal kala duwan oo ay ka mid yihiin goobaha jiifka iyo cuntada ardayda, fasallada waxbarashada, xarumaha tababarrada farsamada, xafiisyada maamulka iyo adeegyo kale oo muhiim ah.

Sidoo kale, waxaa ku yaalla goobo nasasho iyo garoomo ciyaareed, kuwaas oo loo dhisay si waafaqsan heerarka kuliyadaha farsamada iyo xirfadaha. Maamulka Dowlad Deegaanka ayaa sheegay in furitaanka kuliyaddan uu qeyb ka yahay dadaallada lagu ballaarinayo waxbarashada farsamada iyo xirfadaha, si dhalinyarada loogu diyaariyo fursadaha shaqo iyo baahiyaha suuqa shaqada.

Mas’uuliyiinta ayaa xusay in maalgashiga noocan oo kale ah uu gacan ka geysan doono horumarinta aqoonta iyo xirfadaha dhalinyarada deegaanka, isla markaana kor u qaadi doono shaqo-abuurka iyo horumarka bulshada.