Addis Ababa (Dawan) – Waddooyinka waaweyn ee gala Fagaaraha Meskel ee bartamaha magaalada Addis Ababa ayaa maanta laga xirayaa gaadiidka, sababo la xiriira bannaanbax dadweyne oo ka dhacaya magaalada, sida uu ku dhawaaqay booliska caasimadda.
Booliska Addis Ababa ayaa sheegay in xirnaanshaha waddooyinka uu bilaabanayo 5:00 subaxnimo, isla markaana uu socon doono ilaa laga soo gabagabeeyo bannaanbaxa. Waxa uu intaas ku daray in tallaabadan looga gol leeyahay xaqiijinta ammaanka iyo habsami-u-socodka isu-soo-baxa.
Bannaanbaxa ayaa looga soo horjeedaa askareynta carruurta, abaabulka milatari ee khasabka ah iyo rabshadaha ka socda gobolka Tigray. Golaha Nabadda iyo Isbeddelka Tigray, oo ah dhinaca qabanqaabinaya isu-soo-baxa, ayaa sheegay in ujeeddada bannaanbaxu tahay in dowladda federaalka Itoobiya iyo beesha caalamka lagu wargeliyo xaaladda gobolka, isla markaana lagu dalbado tallaabooyin lagu joojinayo dhibaatada ka jirta Tigray.
