Barnaamij lagu taageerayo in ka badan 10,000 qoys oo laga daahfuray Godey

Godey (Dawan) — Barnaamij gargaar oo lagu taageerayo in ka badan 10,000 qoys ayaa laga daahfuray magaalada Godey ee Dowlad Deegaanka Soomaalida, sida ay Jimcihii baahisay warbaahinta Dowlad Deegaanka.

Barnaamijkan waxaa si wadajir ah u fulinaya Xafiiska Arrimaha Bulshada DDS iyo hay’adda UNICEF, iyadoo maalgelintiisa ay bixisay hay’adda UK ee FCDO.

Mashruucu wuxuu ka hirgelayaa degmooyin ay ka mid yihiin Cadaadle, Elele, Hargeelle, Ceelkari, Tulli-guuleed iyo Danood, wuxuuna diiradda saaraya bulshada ay saameeyeen xaaladaha adag iyo dadka nugul, gaar ahaan kuwa qaba baahiyaha gaarka ah.

Mas’uuliyiintu waxay sheegeen in barnaamijku siin doono gargaar lacageed in ka badan 10,150 qoys.

Wasiir ku xigeenka Xafiiska Arrimaha Bulshada DDS, Maxamed Axmed, oo ka hadlay munaasabadda daahfurka, ayaa sheegay in mashruuca lagu fulinayo iskaashi u dhexeeya hay’adaha kala duwan, isla markaana uu sharaxay habka loo gaarsiinayo taageerada dadka ka faa’iideysanaya.

Mas’uuliyiintu waxay intaas ku dareen in barnaamijku yahay mid lagu wajahayo xaaladaha bini’aadantinimo ee ka jira deegaannada la beegsanayo, isla markaana lagu taageerayo bulshada nugul.