Muqdisho (Dawan) — Wasaaradda Arrimaha Dibadda Soomaaliya ayaa sheegtay in dalal badan ay soo saareen bayaan wadajir ah oo ay si adag ugu cambaareynayaan magacaabista safiir ay Israa’iil u direyso Somaliland, iyagoo ku tilmaamay tallaabo xadgudub ku ah madax-bannaanida Soomaaliya.
Bayaanka wadajirka ah oo la sii daayay Sabtidii, ayaa waxaa ku saxiixnaa wasiirrada arrimaha dibadda ee Soomaaliya, Sacuudi Carabiya, Qatar, Masar, Suudaan, Liibiya, Bangladesh, Aljeeriya, Falastiin, Türkiye, Indonesia, Pakistan, Kuwait, Mauritania, Urdun, Cumaan, Lubnaan iyo Yemen, kuwaas oo muujiyay “cambaareyn xooggan” oo ay ka qabaan tallaabadan.
Wasiirradu waxay caddeeyeen in magacaabistaasi ay tahay “xadgudub cad” oo ka dhan ah midnimada, madax-bannaanida iyo wadajirka dhuleed ee Soomaaliya.
Waxay sidoo kale dib u xaqiijiyeen diidmadooda tallaabo kasta oo hal dhinac ah oo wax u dhimaysa madax-bannaanida dowladaha, iyagoo xusay in Dowladda Federaalka Soomaaliya ay tahay wakiilka keliya ee sharciyeysan ee matala shacabka Soomaaliyeed.
