Itoobiya, 25 Oktoobar 2025 – Madaxweynaha Dowlad-Deegaanka Soomaalida, Mustafe Muxummed Cumar, ayaa Isniintii shir guddoomiyey shir looga hadlay sidii looga jawaabi lahaa xaaladda Jiilaalka ee ka jirta degmooyin badan. Kulanka ayaa waxaa ka soo qayb galay mas’uuliyiinta deegaanka iyo hay’adaha gargaarka, iyadoo diiradda lagu saaray diyaar-garowga iyo hawlgelinta degdegga ah.
Wasiirka Maaraynta Khataraha DDS, Axmed Yasin Sheekh Ibraahim, ayaa sheegay in shirkan degdegga ah uu muhiimad gaar ah leeyahay, maadaama gugii hore uu aad u xumaaday, deyrtiina hadda ay sidoo kale fashilantay, iyadoo labo xilli oo roob ah la sugaayey la waayey.
“Madama gugii hore uu aad u xumaaday, deyrtii hadda ay xumatay labo xilli oo roob la sugaayey ay xumadeen. Arrintan waxay saamayn ku yeelatay guud ahaan deegaanka,” ayuu yiri Wasiirka.
Meelaha uu wasiirku tilmaamay ee biya la’aanta ka jirto waxaa ka mid ah gobolka Fafan, oo uu si gaar ah u tilmamay iyo deegenno kale.