Paris, 23 Sebteembar 2025 - Xiddiga Faransiiska Ousmane Dembélé ayaa ku guuleystay Isniintii abaalmarinta Ballon d’Or ee sanadkan 2025, taas oo ahayd tii 69-aad ee la bixiyo, isagoo noqday ciyaaryahankii ugu horreeyay ee Paris Saint-Germain (PSG) u soo hoya kubadda dahabka ah.
Dembélé ayaa hoggaamiyay PSG xilli ciyaareed taariikhi ah oo ay ku qaadeen saddexleydii ugu horreysay ee kooxda – Ligue 1, Coupe de France iyo Champions League. Guusha Champions League oo ahayd tan ugu weyn ayaa Dembélé ka dhigay mishiinka kooxda, isagoo dhaliyay goolal muhiim ah isla markaana caawin joogto ah bixiyay.
Kaalinta labaad waxa galay xiddiga mucjisada ah ee da’da yar Lamine Yamal oo ka tirsan Barcelona iyo xulka Spain, kaas oo sidoo kale ku guuleystay abaalmarinta Da’yarka Ugu Wanaagsan Adduunka. Yamal, oo 18 jir ah, ayaa noqday ciyaaryahankii ugu da’da yaraa ee soo gala saddexda kaalin ee ugu sarreysa Ballon d’Or, isaga oo ka horreeyay halyeeyo waaweyn sida Ronaldo Nazário, Lionel Messi iyo Gianni Rivera.
Kaalinta saddexaad waxaa galay Vitinha oo xilli ciyaareed cajiib ah la qaatay PSG iyo xulka Portugal, isagoo kula guuleystay Nations League.
Muddo dheer ayaa Dembélé loo arkayay ciyaaryahan karti badan balse dhaawacyo badan iyo dhibaatooyin kale haysteen intii uu joogay Barcelona. Tababarihii hore ee Barça, Xavi Hernández, ayaa 2021 sheegay:
“Waxaan ka dhigi karaa Ousmane Dembélé ciyaaryahanka ugu fiican adduunka.”
In kasta oo dad badan qosleen markaas, maanta hadalkaasi waa rumoobay.
Wareysi uu bixiyay, Dembélé ayaa xusuusiyey caruurnimadiisii:
“Waxaan kubadda ku garaaci jirnay darbiga jardiinooyinka, dhiig iyo nabarro ayaana ka dhashay. Halkaas ayaana wax walba ku bartay.”
Lamine Yamal ayaa lagu tilmaamaa ciyaaryahan aan cabsi aqoon. Intii uu 16 iyo 17 jir ahaa, wuxuu horeba u noqday mid muhiim ah oo Barcelona iyo Spain ku hoggaamin kara guulo. Euro 2024 ayuu ku dhaliyay goolkii tartanka ugu quruxda badnaa, isla markaana ku guuleystay UEFA Goal of the Season. Khubaradu waxay sheegeen in Yamal uu yahay mustaqbalka kubadda cagta, ayna suuragal tahay inuu mar kale podium-ka ku soo laabto sannadaha soo socda.
Ballon d’Or tii 69-aad ayaa dib u xasuusisay taageerayaasha ciyaartii farxadda iyo hal-abuurka, iyagoo xusuustay halyeeyo sida Stanley Matthews, Di Stéfano iyo Raymond Kopa.
PSG ayaa dabaaldeg weyn ka bilaabay Paris, taageerayaashuna waxay dareemayaan in guushan ay calaamad u tahay bilow xilli cusub oo uu Dembélé hoggaamin doono, kuna hogaamin karo kooxda inay muddo dheer ka mid noqoto kooxaha ugu sarreeya Yurub.