Soomaaliya, 1 Maarso 2026 (Dawan)– Dowladda Puntland ayaa joojisay dhammaan duulimaadyadii diyaaradda Daallo Airlines ee garoomadeeda, kadib markii ay diyaarad ku eedeysay inay khatar gelisay rakaab iyo mas’uuliyiin laba jeer oo kala duwan.
Wareegto ka soo baxday Wasaaradda Duulista Hawada iyo Garoomada Puntland ayaa lagu sheegay in shatigii ay Daallo Airlines ku hawlgeli jirtay garoomada Puntland laga qaaday laga bilaabo 1-da Maarso.
“Daallo Airlines waxaa lagala noqday shatigii duulimaad ee dhammaan garoomada Puntland kadib markii ay laba jeer khatar gelisay nolosha mas’uuliyiinta iyo muwaadiniinta,” ayuu yiri Wasiirka Duulista Hawada, Cabdullaahi Biile Nuur, oo hadalkaas ku qoray war qoraal ah.
Amarka ayaa lagu faray maamulayaasha garoomada Puntland inay si degdeg ah u dhaqan-geliyaan joojinta, kana horjoogsadaan shirkadda inay duulimaadyo ka samayso garoomada gobolkaas.
Tallaabadan ayaa timid kadib markii diyaarad ay leedahay Daallo Airlines oo ku socotay Garowe maanta oo Axad ah la sheegay inay hawada ka laabatay kuna laabatay Muqdisho, sida ay sheegeen xildhibaano iyo muuqaallo lagu baahiyay baraha bulshada.
