Jigjiga (Dawan) — Dowlad Deegaanka Soomaalida, ayaa bilowday barnaamij qalliimo wadnaha ah oo bilaash ah, kaas oo ay ka faa’iideysanayaan 30 bukaan, iyadoo ujeeddadu tahay in la ballaariyo helitaanka adeegyada caafimaad ee takhasuska sare leh, sida ay sheegtay warbaahinta dowladda deegaanka ee SRTV.
Mas’uuliyiin uu hoggaaminayay Wasiiru-dowlaha Wasaaradda Caafimaadka, Saxarla Cabdullaahi, iyo Wasiirka Xafiiska Caafimaadka DDS, Muuse Axmed, ayaa kormeeray bukaanada lagu daweynayo Cusbitaalka Takhasuska Sare ee Sheekh Xasan Yabare.
Sida ay masuuliyiintu sheegeen, barnaamijkan ayaa yimid kadib markii ay jireen caqabado la xiriira helitaanka qalliinno wadne, kuwaas oo inta badan aan si fudud looga helin gudaha deegaanka, isla markaana ay adag tahay in bulshada badankeed ay iska bixiso kharashaadkooda.
“Daaweynta noocan ah hore ugama jirin deegaanka,” ayay tiri Wasiiru-dowlaha Wasaaradda Caafimaadka.
